ایڈیلیڈ: آسٹریلوی کرکٹر ڈیوڈ وارنر کی اہلیہ اوول گراؤنڈ میں اپنے بچوں کے سامنے بدسلوکی کا نشانہ بن گئیں۔
تفصیلات کے مطابق ڈیوڈ وارنر کی اہلیہ کینڈس وارنر نے انکشاف کیا ہے کہ انھیں ہفتے کی سہ پہر کو ایڈیلیڈ اوول میں اپنی بیٹیوں کے سامنے ’بدسلوکی‘ کا نشانہ بنایا گیا ہے، جس پر انھوں نے کرکٹ گراؤنڈ کو اپنے اور اپنے بچوں کے لیے ’غیر محفوظ جگہ‘ قرار دے دیا۔
نیوزی لینڈ کے ایک اخبار کے مطابق کینڈیس وارنر نے انکشاف کیا ہے کہ وہ ایڈیلیڈ اوول میں بے قابو شائقین کے ایک گروپ کی طرف سے ’بدسلوکی‘ کا نشانہ بنی ہیں، انھوں نے کہا وہ محسوس کرنے لگی ہیں کہ کرکٹ گراؤنڈ ان کے اور ان کے بچوں کے لیے ایک ’غیر محفوظ جگہ‘ ہے۔
سابق آئرن وومن اور ڈیوڈ وارنر کی اہلیہ کینڈس ہارلے برین اور ٹام ٹلی کے ساتھ ایک پروگرام ’سمر بریک فاسٹ‘ کی میزبانی کر رہی ہیں، انھوں نے انکشاف کیا کہ انھیں ویسٹ انڈیز کے خلاف دوسرے ٹیسٹ کے دوران ہفتہ کی دوپہر کو بدسلوکی کا نشانہ بنایا گیا۔
ڈیوڈ وارنر کی اہلیہ نے کرکٹ بورڈ کو آڑے ہاتھوں لے لیا
انھوں نے کہا کہ ہفتہ کی سہ پہر ایڈیلیڈ اوول میں لنچ بریک سے ٹھیک پہلے بیٹیوں نے اپنے والد سے ملنا چاہا، تو ہم گراؤنڈ میں تقریباً 200 میٹر فاصلے پر ایک اور جگہ جانے لگے، پانچ یا چھ آدمیوں کے ایک گروپ سے گزرتے ہوئے ان میں سے کسی نے انتہائی غلیظ آوازیں کسیں۔
کینڈس نے بتایا کہ انھوں نے اپنی بیٹیوں کی ہمت بندھانے کے لیے رکنے اور ان مردوں کا سامنا کرنے کا فیصلہ کیا، وہ سب ہنس رہے تھے اور میری طرف اشارے کر رہے تھے، اس طرح کی حرکتیں کرنے والے حقیقتاً کمزور ہوتے ہیں، اس لیے جس شخص نے جملے اچھالے تھے وہ اپنے دوست کے پیچھے چھپ گیا تھا۔
کینڈس نے بتایا کہ انھوں نے ان مردوں سے پوچھا کہ ایک ماں کی بچوں کے سامنے تذلیل کر کے اور مذاق اڑا کر کیا وہ اچھا محسوس کر رہے ہیں، ایسا کرنا بالکل بھی ٹھیک نہیں ہے، یقیناً ان کے بچے نہیں ہوں گے۔ کینڈس کے مطابق انھیں اس بات پر بھی بہت تکلیف ہوئی کہ بھرے اسٹیڈیم میں کوئی بھی ان کی مدد کو نہیں آیا۔
انھوں نے افسوس کا اظہار کرتے ہوئے کہا کہ ہم تو لڑکیوں کو کھیلوں میں حصہ لینے کی ترغیب دیتے ہیں لیکن اب مجھے یہ محسوس ہونے لگا ہے کہ میرے اور میرے بچوں کے لیے کھیلوں میں جانا محفوظ نہیں ہے۔
کینڈس نے کہا کہ مردوں نے معافی نہیں مانگی لیکن ان میں سے ایک نے انسٹاگرام پر ڈی ایم کیا، اور کہا کہ ’میں نے کچھ نہیں کہا تھا، لیکن میں نے انھیں روکا بھی نہیں تھا، اور مجھے اس کا بہت افسوس ہے میں معذرت خواہ ہوں۔‘
یاد رہے کہ ڈیوڈ وارنر پر 2018 میں جنوبی افریقہ کے خلاف کیپ ٹاؤن ٹیسٹ کے دوران بال ٹیمپرنگ میں ملوث ہونے پر کرکٹ آسٹریلیا کی جانب سے پابندی لگائی تھی، ایک سال کی پابندی کے بعد ٹیم میں ان کی واپسی تو ہو گئی تاہم قیادت کے لیے ان پر تاحیات پابندی عائد ہے، ان کی اہلیہ کینڈس نے اس پابندی کو ناانصافی قرار دیا تھا۔
کینڈس نے بتایا کہ ڈیوڈ ہمیشہ خاندان کو اولیت دیتا ہے، وہ اپنی اور تین لڑکیوں کی سخت حفاظت کرتا ہے، اور کرکٹ ہی سب کچھ نہیں ہے، کرکٹ وہ ہے جو وہ کرتا ہے، لیکن کرکٹ اس کی اور اس شخص کی تعریف نہیں کرتی جو وہ ہے۔
