واشنگٹن: سابق امریکی صدر ڈونلڈ ٹرمپ نے کیپیٹل ہل پر حملے میں تفتیش شامل کیے جانے کی تصدیق کرتے ہوئے اپنی جلد گرفتاری کا خدشہ ظاہر کردیا ہے۔
غیر ملکی میڈیا رپورٹ کے مطابق سابق امریکی صدر ڈونلڈ ٹرمپ کو چھ جنوری حملہ کیس میں شاملِ تفتیش کر لیا گیا، ڈونلڈ ٹرمپ پر کیپٹیل ہل پر حملہ کرنے کے لیے اُکسانے کا الزام ہے۔ْ
کیپیٹل ہل کیس میں شامل تفتیش ہونے پر ٹرمپ نے جلد گرفتاری کا خدشہ بھی ظاہر کر دیا، سابق صدر نے کہا کہ انہیں ٹارگیٹ لیٹر موصول ہوا ہے۔
سابق امریکی وفاقی پراسیکیوٹر پیٹر زیڈنبرگ کا کہنا تھا کہ کسی بھی ملزم کو ’ٹارگیٹ لیٹر‘ ملنا اس بات کی علامت ہوتا ہے کہ اسے متنبہ کیا جائے کہ تم پر فرد جرم عائد کی جا رہی ہے۔
خبر ایجنسی کے مطابق جیوری کے سامنے حکام اپنے بیانات قلمبند کروا چکے ہیں کہ کس طرح سابق امریکی صدر کے اُکسانے پر حامیوں نے کیپیٹل ہل پر حملہ کرکے کانگریس کی جانب سے جو بائیڈن کی جیت کی تصدیق کرنے کے عمل میں رکاوٹ ڈالنے کی کوشش کی تھی۔
