کابل: افغانستان کا دارالحکومت کابل ایک بار پھر دہشت گردی کا نشانہ بنا ہے.
تفصیلات کے مطابق جمعے کی دوپہر کابل میں ہونے والے خودکش حملے میں چار افراد زندگی کی بازی ہار گئے.
افغان میڈیا کے مطابق خودکش بمبار نے کار حملے کے ذریعے امریکی فوجی قافلے کو نشانہ بنایا.
امریکی فوجی قافلہ نواحی علاقے یکاتوت کی سمت گامزن تھا، افغان وزارت دفاع کے ترجمان نصرت رحیمی نے ہلاکتوں کی تصدیق کی ہے.
جرمن خبر رساں ادارے کے مطابق کابل میں امریکی فوج کے عہدے دار باب پورٹیمین نے کہا ہے کہ حملے میں امریکی فوجی زخمی بھی ہوئے ہیں۔ افغان طالبان نے اس حملے کی ذمہ داری قبول کی ہے.
مزید پڑھیں: پاکستان کا افغانستان کے استحکام کے لئے حمایت جاری رکھنے گا اعلان
یہ افغانستان میں ہونے والا مسلسل دوسرا خودکش حملہ ہے۔ جمعرات افغان آرمی اکیڈیمی کے باہر ہونے والے حملے میں چھ افراد مارے گئے تھے۔
خیال رہے کہ ماسکو میں ہونے والے مذاکرات کے دور میں افغان طالبان کے سیاسی امور کے نگران ملا برادر اخوند نے کہا تھا کہ افغانستان میں قیامِ امن سے متعلق کسی بھی معاہدے پر اتفاق کیلئے بین الاقوامی افواج کا انخلاء انتہائی ضروری ہے۔
