ریگا : لٹویا کے دارالحکومت ریگا میں ایک انوکھا واقعہ پیش آیا ہے جسے دیکھنے والے حیرت زدہ رہ گئے، کسی نے اسے بھوت پریت کا شاخسانہ قرار دیا تو کوئی اسے انسانی غفلت کا پیش خیمہ بتا رہا ہے۔
ہوا کچھ یوں کہ سڑک کے کنارے پارکنگ میں کھڑی ایک خالی سرخ رنگ کی کار خود بخود پیچھے کی جانب چلتی ہوئی سڑک پار کرتے ہوئے دریا میں جاگری۔
یہ واقعہ رواں ماہ 14 اپریل کو اس وقت پیش آیا جب دو افراد نے دریا کے قریب پارکنگ میں اپنی کار کھڑی کی۔ کلپ کے آخر میں کار پانی میں ڈوبی ہوئی دکھائی دیتی ہے۔
اس کے صرف چند منٹوں کے بعد کار سڑک کے پار آہستہ آہستہ چلنے لگی، جس کے بارے میں پولیس کا خیال ہے کہ یہ ہینڈ بریک نہ لگانے کی وجہ سے ہوا تھا۔
وہاں پر یہ منظر دیکھنے والے لوگ پہلے تو خود بھی خوفزدہ ہوئے اور حقیقت جاننے کے بعد ان کی جان میں جان آئی۔
غیر ملکی خبر رساں ادارے کی رپورٹ کے مطابق گاڑی کو ابتدائی طور پر پانی میں داخل ہونے کے بعد تیرتے ہوئے دیکھا جا سکتا تھا۔ بعد ازاں کار بالآخر دریا کی تہہ میں دھنس گئی اور ہنگامی خدمات اگلے دن تک گاڑی کا پتہ نہیں لگا سکیں۔