نگران وزیر خارجہ جلیل عباس جیلانی کا کہنا ہے کہ اسرائیلی قابض افواج کے تشدد، جبر کو فوری بند کرنے کا مطالبہ کرتے ہیں۔
اے آر وائی نیوز کے مطابق نگران وزیر خارجہ جلیل عباس جیلانی نے سوشل میڈیا پر جاری بیان میں لکھا کہ پاکستان کو مشرق وسطیٰ میں بڑھتی کشیدگی پر گہری تشویش ہے، موجودہ صورتحال میں فلسطینیوں کے ساتھ یکجہتی کے طور پر کھڑے ہیں اور اسرائیلی قابض افواج کے تشدد اور جبر کو فوری طور پر بند کرنے کا مطالبہ کرتے ہیں۔
آپریشن طوفان الاقصیٰ جاری، ہلاک اسرائیلیوں کی تعداد 530 سے تجاوز کر گئی
نگران وزیر خارجہ نے کہا کہ 1967 سے پہلے کی سرحدوں کی بنیاد پر خود مختار ریاست فلسطین کا قیام ضروری ہے، عالمی برادری تنازعات کے خاتمے، شہریوں کی حفاظت کیلئے اقدامات کرے، عالمی برادری مشرق وسطیٰ میں دیرپا امن کیلئے فوری مداخلت کرے۔
خیال رہے کہ فلسطینی مزاحمتی تنظیم حماس کے اسرائیل پر حملوں میں سینئر فوجی کرنل سمیت ہلاک اسرائیلیوں کی تعداد 500 سے تجاوز کر گئی جب کہ 1700سے زائد افراد زخمی ہیں جب کہ 480 فلسطینی بھی شہید ہوئے ہیں۔۔
دریں اثنا اسرائیل نے غزہ کے لیے تمام سپلائی معطل کرنے کا اعلان کر دیا ہے۔ اسرائیل نے غزہ کے لیے فیول، اشیا اور بجلی کی سپلائی بھی معطل کر دی ہے جس کے بعد غزہ تاریکی میں ڈوب گیا۔
