کراچی : نگران وزیر تجارت گوہر اعجاز نے شہر قائد میں دکانیں اور مارکیٹیں جلدی بند کرانے کے حوالے سے تاجروں کو اپنا فیصلہ سنا دیا۔
کراچی چیمبر آف کامرس اینڈ انڈسٹری کے دورے کے موقع پر تقریب سے خطاب کرتے ہوئے نگران وزیر تجارت گوہراعجاز نے معاشی سرگرمیوں سے متعلق تاجروں کی شکایات کا ازالہ کرنے کی یقین دہانی کرائی۔
اپنے خطاب میں گوہر اعجاز نے دکانیں جلد بند کرنے کی تجویز مسترد کرتے ہوئے کہا کہ حکومت کے پاس سرپلس بجلی ہے، جلدی دکانیں بند کرانےسے حکومت کو نقصان ہوگا، اس حوالے سے ملک بھرکے تمام چیمبرز سے30روز میں تجاویز طلب کی گئی ہیں۔
نگران وزیر تجارت نے کہا کہ بجلی چوروں کے بعد گیس چوروں کیخلاف بھی بڑا آپریشن کیا جائے گا، گیس چوری میں ملوث ملزمان کو نہیں چھوڑا جائے گا، ملک میں گیس نہیں ہے لہٰذا تاجروں کو اپنی ضد چھوڑنا ہوگی۔
ان کا کہنا تھا کہ دنیا بھر کے100بڑے برانڈز کو پاکستان لاکر کانفرنس منعقد کریں گے، تمام برانڈز کو اسٹیٹ گیسٹ کے ساتھ سرکاری مہمان کا درجہ دیا جائے گا۔
ڈالر کی قیمت سے متعلق گوہراعجاز نے بتایا کہ آج ملک میں ڈالر کا حقیقی ایکسچینج ریٹ 260روپے ہے، ڈالر182پر تھااب 300تک پہنچ گیا ہے،350کا ڈالر آج 290روپے کے درمیان ہے۔
انہوں نے کہا کہ افغانستان، ایران سے اسمگلنگ کا حجم 5ارب ڈالرز سے بڑھ گیا ہے، ایکسچینج کمپنی کے ذریعے سارا ڈالر اوپن مارکیٹ سے اسمگل ہونے لگا۔
بیرونی سرمایہ کاری سے متعلق ان کا کہنا تھا کہ براہ راست سرمایہ کاری اس وقت آئے گی جب برآمدات میں اضافہ ہوگا، ہم آج بھی دبئی، سعودی عرب کا انتظار کرتے ہیں کہ وہ پیسے دینگے۔
نگران وزیر تجارت نے مزید کہا کہ ہمیں اپنی پالیسیز کو بہتر کرنا ہوگا، تمام صنعت کار دبئی کا خواب ذہنوں سے نکال دیں صرف پاکستان کا سوچیں، میں نے اسمگلنگ رکوا دی ہے، پیسوں کو ڈالرمیں تبدیل کرکے دبئی مت بھیجیں۔
