اسلام آباد: 9 اگست کو اسمبلی تحلیل ہونے کے بعد اب تک نگراں وزیر اعظم کا نام سامنے نہیں آیا تاہم اب اس دوڑ میں بلوچستان سے ایک اور نام شامل کرلیا گیا۔
تفصیلات کے مطابق 9 اگست کو صدر مملکت عارف علوی نے وزیراعظم کی ایڈوائس پر قومی اسمبلی تحلیل کردی تھی تاہم اب تک نگراں وزیر اعظم کا نام سامنے نہیں آیا ہے۔
ذرائع کے مطابق نگراں وزیراعظم کے لیے سابق وزیر اعلیٰ بلوچستان جام کمال کا نام زیر غور ہے، رہنما پی ڈی ایم ذرائع کے مطابق بلوچستان سے نام فائنل ہوا تو جام کمال اور صادق سنجرانی میں مقابلہ ہے۔
’صدر کو جلدی کیوں ہے؟ نگراں وزیراعظم کا فیصلہ کل کریں گے‘
واضح رہے کہ جام کمال نےگزشتہ ماہ مریم نواز سےملاقات کی تھی، نواز شریف کی سعودی عرب موجودگی کے دوران بھی جام کمال وہاں موجود تھے۔
خیال رہے کہ 9 اگست کو قومی اسمبلی مدت مکمل ہونے سے قبل توڑ دی گئی ہے اور نگران وزیراعظم کے نام پر اتفاق کیلئے وزیراعظم شہباز شریف اور اپوزیشن لیڈر راجہ ریاض ملاقات کرچکے ہیں جس میں دونوں طرف سے ناموں کا تبادلہ کیا گیا۔
کیا آپ نگراں وزیراعظم بن رہے ہیں؟ صحافی کے سوال پر اسحاق ڈار نے کیا کہا؟
جبکہ گزشتہ روز صدر مملکت عارف علوی نے وزیراعظم میاں محمد شہبار شریف، اور تحلیل شدہ قومی اسمبلی کے قائدِ حزبِ اختلاف راجہ ریاض احمد کو لکھا تھا جس میں ان سے 12 اگست تک نگراں وزیراعظم کا نام دینے کے لیے کہا گیا ہے۔
خط میں کہا گیا تھا کہ آئین کے آرٹیکل 224 ون اے کے تحت صدر مملکت، وزیراعظم اور قائد ِحزب ِاختلاف کے مشورے سے نگران وزیرِ اعظم کی تعیناتی کرتے ہیں۔
یاد رہے کہ آئین کے تحت وزیرِ اعظم اور قائدِ حزب اختلاف کو قومی اسمبلی کی تحلیل کے 3 دن کے اندر نگراں وزیرِ اعظم کا نام تجویز کرنا ہوتا ہے۔
