اسلام آباد : پاکستان نے ترکی اور ایران کے ساتھ مل کر تینوں ممالک کے درمیان ٹرین سروس آپریشنل کرنے پر اتفاق کرلیا، سروس کی بحالی کیلئے ابتدائی کام بھی مکمل کر لیا گیا ہے۔

تفصیلات کے مطابق پاکستان نے خطے میں تجارتی روابط بڑھانے کیلئے انتہائی اہم فیصلہ کیا ہے جس کے تحت پاکستان، ترکی اور ایران نے اسلام آباد سے تہران اور پھر استنبول تک ریل سروس بحال کرنے پر اتفاق کرلیا ہے۔

اس حوالے سے ذرائع کا کہنا ہے کہ حالیہ معاہدے کے مطابق یہ  ریل سروس اگلے سال سے باقاعدگی سے چلائی جائے گی اور45 دن کا سفرصرف 13 دن میں طے ہوگا۔

اسلام آباد، تہران، استنبول کارگو ٹرین سروس اگلے برس آپریشنل کی جائے گی، اس منصوبے کی بحالی کا فیصلہ دو ہفتے قبل ایک آن لائن اجلاس کے دوران کیا گیا، اس حوالے سے استنبول میں اکنامک تعاون تنظیم کا اہم اجلاس ہوا جس میں پاکستان، ایران اور ترکی کے ریلوے حکام نے شرکت کی۔

اجلاس میں تینوں ممالک کے نمائندگان نے ٹرین سروس سے متعلق اپنی رپورٹس پیش کیں اور اس سے متعلق مسائل اور مشکلات پر گفتگو کی۔ اجلاس میں طے پایا کہ تینوں ممالک تجارتی روابط بڑھانے کیلئے اگلے برس اسلام آباد، تہران، استنبول کارگو ٹرین سروس بحال کر لیں گے۔