اسلام آباد : احتساب عدالت کی جانب سے سابق وزیراعظم شاہد خاقان عباسی کیخلاف ایل این جی ریفرنس میں عدالتی دائرہ اختیار سے متعلق فیصلہ 10 جولائی کو سنایا جائے گا۔
تفصیلات کے مطابق سابق وزیراعظم شاہدخاقان عباسی کیخلاف ایل این جی ریفرنس میں اہم پیشرفت سامنے آئی، احتساب عدالت نے ایل این جی ریفرنس میں عدالتی دائرہ اختیار سے متعلق فیصلہ محفوظ کرلیا۔
احتساب عدالت کے جج محمد بشیر 10 جولائی کو فیصلہ سنائیں گے، نیب نے ایل این جی ریفرنس اسپیشل جج سینٹرل کی عدالت میں منتقل کرنے کی استدعا کی ہے۔
نیب پراسیکیوٹر نے کہا کہ نیب ترمیمی آرڈیننس کے بعدیہ کیس ایف آئی اےکادائرہ اختیارہے، ریفرنس اسپیشل جج سینٹرل اسلام آباد کا دائرہ اختیار ہے۔
احتساب عدالت نے نیب پراسیکیوٹرسمیت دیگر فریقین کے دلائل مکمل ہونے کے بعد سابق وزیر اعظم شاہد خاقان عباسی کی آج کی حاضری سے استثنیٰ کی درخواست منظور کرلی۔
یاد رہے ایل این جی ریفرنس میں ملزمان نے نیب آرڈیننس کے تحت عدالتی دائرہ اختیار چیلنج کررکھا تھا۔
