کراچی : شہر قائد میں ڈکیتی مزاحمت پر خاتون کے قتل کا مقدمہ درج کرلیا گیا ، مدعی مقدمے نے کہا کہ ملزمان نے موبائل فون اور دیگر سامان نہ دینے پر میری بہن کو گولیاں ماری۔
تفصیلات کے مطابق کراچی میں پانچ روز کے دوران ہی ڈکیتی کے دوران 2 قتل ہوگئے، گلستان جوہر میں ڈکیتی مزاحمت پرثناء طارق نامی خاتون کو قتل کردیا گیا،
شارع فیصل تھانے میں مقتولہ کے بھائی احسن کی مدعیت میں ڈکیتی اور قتل کی دفعات کے تحت مقدمہ درج کرلیا گیا ہے۔
مقتولہ کے بھائی نے بتایا کہ واقعہ گلستان جوہر بلاک17میں پیش آیا تھا، میں رات 8:10 پر اپنی بہن کے ساتھ گاڑی میں والدہ کی دوائیں لینے گیا تھا، بہن گاڑی میں بیٹھی تھی۔
مدعی مقدمے کا کہنا تھا کہ خریداری کے دوران گولیاں چلنے کی آواز آئی جب میں نے باہر نکل کر دیکھا تو میری گاڑی کے اطراف رش لگا ہوا تھا۔
وہاں موجود لوگوں نے بتایا کہ موٹر سائیکل سوار دو ملزمان نے اسلحہ کے زور پر لوٹنے کی کوشش کی، ملزمان نے موبائل فون اور دیگر سامان نہ دینے پر فائرنگ کی اور میری بہن ثناء طارق کو گولیاں ماری۔
ملزمان کار میں رکھا میرا پرس اور 5ہزار اور موبائل فون لوٹ کر فرار ہوئے، جس کے بعد میں نے شدید زخمی حالت میں بہن کو اسپتال منتقل کیا گیا جہاں وہ زخموں کی تاب نہ لاتے ہوئے انتقال کرگئی۔
گذشتہ روز گلستان جوہر میں ڈاکوؤں نے ڈکیتی مزاحمت پر گولی مارکر خاتون کی جان لے لی ، پولیس کا کہنا ہے کہ خاتون کاموبائل فون لاپتہ ہے۔
