اسلام آباد: مشترکہ مفادات کونسل (سی سی آئی) کا اجلاس 2 مئی 2025 کو وزیر اعظم ہاؤس میں طلب کر لیا گیا جس کی صدارت وزیر اعظم شہباز شریف کریں گے۔
اجلاس میں چاروں صوبوں کے وزرائے اعلیٰ کو شرکت کیلیے مراسلہ ارسال کر دیا گیا۔ سی سی آئی اجلاس میں 24 افسران اور ذمہ داران کو خصوصی مدعو کیا گیا ہے جبکہ مستقل ممبران کے علاوہ 7 وفاقی وزرا اور چاروں صوبوں کے چیف سیکرٹریز بھی شریک ہوں گے۔
اجلاس میں پیپلز پارٹی اور مسلم لیگ (ن) کے کینالز سے متعلق فیصلے کی توثیق کی جائے گی۔
یہ بھی پڑھیں: پیپلز پارٹی بجٹ سے پہلے کینالز منصوبہ مسترد کروائے گی، وزیر اعلیٰ سندھ
گزشتہ روز چیئرمین پیپلز پارٹی بلاول بھٹو زرداری نے وزیر اعظم شہباز شریف سےمتنازع کینالز منصوبے کے حوالے ملاقات کی تھی۔
وزیر اعظم نے بلاول بھٹو زرداری کے ساتھ پریس کانفرنس کرتے ہوئے واضح کیا تھا کہ باہمی رضامندی کے بغیر مزید کوئی کینال نہیں بنائی جائے گی۔
شہباز شریف کا کہنا تھا کہ کینالز کے معاملے پر آج پیپلز پارٹی وفد کے ساتھ بات چیت ہوئی، فیڈریشن اور صوبوں کے درمیان معاملات بات چیت کے ذریعے حل کریں گے۔
انہوں نے کہا تھا کہ وفاق سے زیادہ کوئی چیز اہم نہیں، وفاقی اکائیوں اور سندھ نے کالا باغ ڈیم پر تحفظات کا اظہار کیا تھا، ایسے ہی کینالز کے معاملے پر بھی باہمدی رضامندی سے حل کرنا چاہیے۔
علاوہ ازیں وزیر اعظم کا کہنا تھا کہ مشترکہ مفادات کونسل کا اجلاس 2 مئی بروز جمعہ کو بلایا جا رہا ہے جس میں وفاقی حکومت کے فیصلوں کی تائید کی جائے گی۔
دوسری جانب بلاول بھٹو زرداری کا کہنا تھا کہ ملاقات میں سندھ کے عوام جو احتجاج کر رہے ہیں انہیں ایڈریس کیا گیا ہے، امید ہے سی سی آئی کا اجلاس 2 مئی کو بلایا جائے گا آج کوئی فیصلہ نہیں لے رہے طے کر رہے ہیں کہ اتفاق رائے کے بغیر کوئی نئی نہرنہیں بن رہی۔
بلاول بھٹو زرداری کا کہنا تھا کہ اس وقت زیادہ اہم پہلو جو بھارت نے سندھ طاس معاہدہ ختم کرنے کا اعلان کیا ہے وہ قابل مذمت ہے، بھارت سندھ طاس معاہدہ ختم نہیں کر سکتا یہ انسانیت کے خلاف ظلم ہے، بھارت کے اقدامات کو عالمی سطح پر اٹھائیں گے اور منہ توڑ جواب دیں گے۔
