اسلام آباد: صدر مملکت آصف علی زرداری نے سی ڈی اے آرڈیننس 2025 جاری کر دیا۔
تفصیلات کے مطابق صدر پاکستان آصف علی زرداری نے سی ڈی اے آرڈیننس 2025 جاری کر دیا، سی ڈی اے آرڈیننس 1960 میں اہم ترامیم کا نفاذ فوری ہوگا۔
آرڈیننس کے مطابق زمین اور تعمیر شدہ جائیداد پر الگ الگ ایوارڈ جاری ہوں گے، متاثرہ افراد کو زمین، نقدی یا دیگر صورت میں معاوضہ ملے گا، اور زیر التوا بحالی کے کیسز موجودہ پالیسی کے تحت نمٹائے جائیں گے۔
ٹیکس چوری روکنے کے لیے نیا آرڈیننس جاری
معاوضے کی ادائیگی میں تاخیر پر 8 فی صد سالانہ اضافی رقم دی جائے گی، آرڈیننس کے تحت متبادل زمین کی قدر، سہولت اور رسائی میں مساوی ہونا لازمی قرار دیا گیا ہے۔
نابالغ یا معذور افراد کی طرف سے معاوضہ وصولی کا نیا طریقہ کار بھی متعارف کرایا گیا ہے، ترمیم شدہ آرڈیننس میں عارضی استعمال شدہ زرعی زمین پر بھی منصفانہ معاوضے کی شق شامل کی گئی ہے۔
سی ڈی اے ترامیم کے تحت متاثرہ افراد کے حقوق کے تحفظ کو یقینی بنایا گیا ہے۔
