اسلام آباد: چیف الیکشن کمشنر سکندر سلطان راجہ نے نگراں وزیراعظم انوار الحق کاکڑ سے الیکشن کے دنوں میں لوڈشیڈنگ نہ کرنے کی درخواست کردی۔
تفصیلات کے مطابق چیف الیکشن کمشنر سکندر سلطان راجہ نے نگران وزیر اعظم انوار الحق کاکڑ کو خط لکھا۔
چیف الیکشن کمشنر سکندر سلطان راجہ نے خط میں عام انتخابات کے پیش نظر ملک بھر میں3روزکیلئے لوڈشیڈنگ نہ کرنےکی درخواست کی ہے۔
ذرائع نے بتایا کہ خط میں بجلی کی بلاتعطل فراہمی7تا9فروری یقینی بنانے کے انتظامات کی استدعا کی گئی ہے۔
چیف الیکشن کمشنر نے نگران وزیراعظم کو متعلقہ اداروں کو احکامات جاری کرنے کی درخواست کرتے ہوئے کہا ہے کہ عام انتخابات کیلئے ملک بھر میں بجلی کی بلا تعطل فراہمی ناگزیر ہے۔
خط میں کہا ہے کہ انتخابات والی رات بجلی میں تعطل مشکلات پیدا کرسکتی ہے، پولنگ اسٹیشز میں نتائج کی تیاری کےعمل میں بجلی کے تعطل سے رکاوٹ کھڑی ہوسکتی ہے۔
