اسلام آباد: مردم شماری 2017 میں 10 بڑے شہروں کی آبادی کے نتائج جاری کردیے گئے جس کے مطابق کراچی کی آبادی ایک کروڑ 49 لاکھ اور لاہور کی آبادی ایک کروڑ 11 لاکھ ہوگئی۔
تفصیلات کے مطابق محکمہ شماریات پاکستان کی جانب سے ملک بھر میں کی گئی چھٹی مردم شماری 2017ء کے نتائج کا مرحلہ وار اعلان کیا جارہا ہے، تین روز قبل ملکی آبادی بتائی گئی جو کہ 20 کروڑ 77 لاکھ 74 ہزار 520 ہے جب کہ چاروں صوبوں کی علیحدہ علیحدہ آبادی بتائی گئی اور اب 10 بڑے شہروں (ڈسٹرکٹ )کی آبادی کے نتائج جاری کردیے گئے ہیں۔
شماریات بیورو آف پاکستان کے مطابق کراچی کی آبادی 1 کروڑ 49 لاکھ، لاہور 1 کروڑ 11 لاکھ، فیصل آباد 32 لاکھ، راولپنڈی اور گوجرانوالہ 20 ،20 لاکھ، پشاور 19 لاکھ، ملتان 18، حیدرآباد 17 جب کہ اسلام آباد اور کوئٹہ کی آبادی کی 10، 10 لاکھ ہوگئی ہے۔
ان اعدادو شمار کے مطابق 1998ء کے بعد سے اب تک کراچی کی آبادی میں 59 فیصد اور لاہور کی آبادی میں 116 فیصد اضافہ ہوا۔
قبل ازیں صوبائی آبادی بھی ظاہر کی گئی تھی جس کا چارٹ درج بالا ہے۔
