اسلام آباد: صدر پاکستان آصف زرداری نے کہا ہے کہ مشترکہ ترقی ، خوشحالی کیلئے وسطی ایشیائی ممالک گوادر بندرگاہ سے مستفید ہوسکتے ہیں۔
تفصیلات کے مطابق 5ویں بین الاقوامی ورکشاپ برائے قیادت و استحکام سے خطاب کرتے ہوئے صدر مملکت آصف علی زرداری کا کہنا تھا کہ جامع اور پائیدار ترقی کیلئے ممالک کے درمیان تعاون کے فروغ کی ضرورت ہے، پاکستان وسطی ایشیائی ممالک کے لیے گیٹ وے کی حیثیت رکھتا ہے۔
صدر مملکت نے علاقائی روابط اور اقتصادی تعاون کے لیے پاکستان کے عزم کا اعادہ کیا اور کہا کہ ایک مستحکم دنیا مشترکہ ترقی کےلیے ناگزیر ہے، دنیا کو اقتصادی، ماحولیاتی، سیکیورٹی، غلط معلومات اور تکنیکی چیلنجز کا سامنا ہے۔
انھوں نے کہا کہ موجودہ عالمی چیلنجز سے نمٹنے کےلیےعالمی تعاون درکار ہے، قیادت کی ذمہ داری ہے کہ تعاون کے مواقع پیدا کرے۔
آصف زرداری نے کہا کہ قیادت لوگوں کی فلاح اور مشترکہ امن، خوشحالی کےلیے کام کرے، قیادت لوگوں کو ایک مشترکہ وژن کے گرد متحد کرے، قیادت پائیدار ترقی کے اہداف کے حصول کی ترغیب دے،
صدر پاکستان نے کہا کہ دیرپا تبدیلی کیلئے مکالمے، تعاون اور امید کو فروغ دینا ہوگا، صدرمملکت نے محفوظ پائیدار مستقبل کیلئے عالمی شراکت داروں کو ملکر کام کرنے کی بھی دعوت دی۔
ورکشاپ میں مختلف شعبوں سے تعلق رکھنے والے 64 غیرملکی اور 32 پاکستانیوں نے شرکت کی، موسمیاتی تبدیلی، غربت اور غلط معلومات کے چیلنجز سے نمٹنے کیلئے عالمی تعاون پر زور دیا گیا۔
