لاہور: واہگہ بارڈر پر پاکستان زندہ باد اور اللہ اکبر کی صداؤں کے درمیان پرچم اتارنے کی تقریب منعقد ہوئی، جس میں شہریوں کی بڑی تعداد نے شرکت کی، پرچم کشائی کی تقریب میں روایتی جوش و جذبہ دیکھنے میں آیا۔
تفصیلات کے مطابق جشن آزادی پر واہگہ بارڈر پر پرچم اتارنے کی تقریب روایتی جوش وخروش کے ساتھ منعقد ہوئی، جس میں شہریوں کی بڑی تعداد نے شرکت کی، فضا نعرہ تکبیراللہ اکبراور پاکستان زندہ باد کے نعروں سے گونج اٹھی۔
ننھے سپاہی نے سب کا لہو گرما دیا، ہزاروں پاکستانی بچے، نوجوان بوڑھے اور خواتین جوق در جوق اس تقریب کو دیکھنے کے لیے واہگہ بارڈر پہنچے۔
پاکستان رینجرز کے شیر دل جوانوں کے بوٹوں کی گھن گھرج اور وطن کی حفاظت کے جذبے سے مامور پریڈ پاکستانیوں کا لہو خوب گرماتی رہی، واہگہ پر موجود کیا بچے، بزرگ، خواتین سب ہی بہت پُرجوش اور بھرپور انداز میں اپنے سپاہیوں کا حوصلہ بڑھاتے رہے۔
اس موقع پر فضا پاکستان زندہ باد، نعرہ تکبیر اللہ اکبر اور جیوے جیوے پاکستان کے نعروں سے گونجتی رہی. قبل ازیں ملی نغموں اور قومی ترانوں پر لوگ والہانہ انداز میں رقص کرتے رہے اور بھنگڑا ڈالتے رہے۔
تقریب میں بالخصوص نوجوانوں اور بچوں کاجو ش و جذبہ دیدنی تھا، منچلوں کے بھنگڑوں اور نعرے بازی نے ماحول کو گرمائے رکھا، فلک شگاف نعروں کی گونج، جوش وجذبے سے جگمگاتے چہروں اورلہراتے پرچموں کے ساتھ واہگہ بارڈر پر ہونے والی تقریب نے 1965 کی تاریخی فتح کی یادیں تازہ کردیں۔
