سرائے عالمگیر : مسلم لیگ ق کے صدر چودھری شجاعت حسین نے کہا ہے کہ گالی گلوچ پر بھی تحمل کا مظاہرہ کرنے والے ججوں پر آفرین ہے، فاضل جج چاہیں تو توہین عدالت کے مجرموں کو جیل بھیج سکتے ہیں،مجھے عام انتخابات ہوتے نظر نہیں آرہے۔
ان خیالات کا اظہار انہوں نے تحصیل سرائے عالمگیر راجہ محمد اسلام ذمہ واریا کے کمیونٹی سینٹر کا افتتاح کرنے کے بعد میڈیا سے گفتگو کرتے ہوئے کیا۔
چوھدری شجاعت حسین کا کہنا تھا کہ میں نے اپنی 45 سالہ سیاسی زندگی میں فوجی دور بھی دیکھے اور سویلین بھی، اپوزیشن میں رہا اور حکومت میں بھی لیکن ایسا گندا دور نہیں دیکھا جس میں جمہوریت کے نام پر جمہوریت کی مٹی پلید کی جا رہی ہو۔
عدلیہ کو گالیاں نکالی جا رہی ہیں لیکن آفرین ہے ان ججوں پر جو ابھی تک صبر کا مظاہرہ کر رہے ہیں، انہوں نے کہا کہ فاضل جج چاہیں تو سوٹ پہن کرآنے والے توہین عدالت کے مجرموں کو6،6ماہ کیلئے مچھ جیل بھیج سکتے ہیں تاکہ وہاں سوٹوں میں اگلا موسم انجوائے کریں۔
چوھدری شجاعت حسین کا کہنا تھا کہ اگر کسی کو کرپشن میں سزا ہوئی تو اس کے حق میں کسی نے بھی ہڑتالیں اور ہنگامے نہیں کیے۔
ایک سوال کے جواب میں چوھدری شجاعت حسین کا کہنا تھا کہ مجھے2018 میں الیکشن ہوتے نظر تو نہیں آ رہے ہیں کیونکہ حلقہ بندیوں میں کافی گڑبڑ ہوئی ہے اگرالیکشن ہوئے بھی تو کسی سیاسی جماعت کے ساتھ اتحاد ہو یا نہ ہو ہم پوری قوم کے ساتھ لڑیں گے۔
رہنماق لیگ نے مزید کہا کہ ہم کوئی اور بات کرنے کے بجائے پہلے پاکستان کی بات کرتے ہیں کیونکہ پاکستان ہے تو ہم سب ہیں، سینیٹ الیکشن میں ہارس ٹریڈنگ پر افسوس ہے، ملک انتشارکا متحمل نہیں ہوسکتا، تحمل اور رواداری میں ہی کامیابی ہے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
