مسلم لیگ ق کے مرکزی رہنما چوہدری شجاعت حسین نے کہا ہے کہ ملک میں جوحالات ہیں ایسے حالات پہلے کبھی نہیں دیکھے، سانحہ ماڈل ٹاؤن کی تاریخ دوبارہ نہ دہرائی جائے۔
ملک کی حالیہ سیاسی اور معاشی صورتحال کے حوالے سے گفتگو کرتے ہوئے ان کا کہنا تھا کہ حکومت اور سیاسی جماعتیں جس سمت جارہی ہیں اس سے افراتفری مزید بڑھےگی۔
چوہدری شجاعت نے کہا کہ عدلیہ اور فوج کو مل بیٹھ کر ان تمام مسائل کا مستقل حل نکالنا چاہیے، پاکستان کے معاشی حالات انتہائی سنگین ہوگئے ہیں۔
انہوں نے کہا کہ بڑھتی قیمتوں سے عام آدمی کا جینا تو پہلے ہی مشکل ہے، یہ نہ ہو خدانخواستہ عوام کا مرنا بھی مشکل ہوجائے۔
رہنما ق لیگ نے کہا کہ سارا ملک بند ہونے کی وجہ سے اشیائے خورد ونوش کی قلت کا خدشہ ہے، آمدورفت مفلوج ہے، ایمبولینس تک کو راستہ میسر نہیں، لوگ جنازوں کو لے کر پیدل جانے پر مجبور ہیں۔
چوہدری شجاعت کا کہنا تھا کہ عالمی سطح پر پاکستان کی صورتحال کو غور سے دیکھا جا رہا ہے، سانحہ ماڈل ٹاؤن کی تاریخ دوبارہ نہ دہرائی جائے، پولیس کو چاہیے وہ شیلنگ فوری طور پر بند کرے۔
ان کا کہنا تھا کہ شیلنگ سے گلیوں اور محلوں میں رہنے والے بھی اذیت کا شکار ہیں، پولیس ایمبولینس اور جنازوں کو نکالنے کا راستہ فراہم کرے، جو قافلے گزریں یا جائیں گجرات کے پارٹی رہنما پانی اور کھانے کا انتظام کریں۔
