مسلم لیگ ق کی صدارت کے معاملے پر الیکشن کمیشن نے محفوظ فیصلہ سنا دیا ہے چوہدری شجاعت حسین کو پارٹی کا صدر برقرار رکھا گیا ہے۔
اے آر وائی نیوز کے مطابق گزشتہ سال سے ق لیگ میں دھڑے بندی کے بعد پارٹی میں صدارت کا تنازع چل رہا تھا۔ پارٹی رہنما چوہدری وجاہت حسین نے پارٹی آئین میں ترامیم کی تھیں اور پارٹی صدر کی مدت تین سال کے بجائے دو سال کر دی تھی۔
پارٹی آئین میں ترمیم کا معاملہ ہائیکورٹ میں زیر سماعت رہا اور ہائیکورٹ نے آئین میں ترمیم کا معاملہ الیکشن کمیشن کو بھجوایا تھا۔ الیکشن کمیشن نے مذکورہ کیس کی سماعت کی تھی اور فیصلہ محفوظ کر لیا تھا جو آج سنا دیا گیا ہے۔
الیکشن کمیشن نے ق لیگ کے رہنما چوہدری وجاہت حسین کی درخواست خارج کر دی ہے اور چوہدری شجاعت حسین کو مسلم لیگ ق کا صدر برقرار رکھا گیا ہے۔
الیکشن کمیشن نے اپنے مختصر فیصلے میں کہا ہے کہ چوہدری وجاہت پارٹی کے آئین میں ترمیم نہیں کرسکتے کیونکہ انہیں اس میں ترامیم کا حق حاصل نہیں ہے۔
