کراچی : چیئرمین انٹرمیڈیٹ بورڈ شرف علی شاہ نے طلبا کے کاپیوں میں گانے لکھنے کے دعویٰ کے بعد ایک اور دعویٰ کرتے ہوئے کہا بچے نے کاپی میں ہزار کا نوٹ رکھ کر لکھا پلیز مجھے پاس کردیں۔
تفصیلات کے مطابق کراچی میں انٹر سال اول کے امتحانات گزشتہ سال کی طرح اس سال بھی متنازع ہوگئے، کامیابی کا تناسب پری میڈیکل میں تینتس فیصد جب کہ پری انجینئرنگ میں انتیس فیصد رہا۔
انٹرمیڈیٹ بورڈ کراچی کے تحت گیارہویں جماعت کے نتائج پر طلبہ اوروالدین سمیت سیاسی جماعتیں بھی تحفظات کا اظہار کررہی ہیں تاہم بورڈ نے ان تحفظات کو دور کرنے کیلئے ایک تحقیقاتی کمیٹی قائم کی ہے جب کہ اسکروٹنی فیس پچاس فیصد کم کردی ہے۔
چیئرمین انٹرمیڈیٹ بورڈ شرف علی شاہ نے طلبا کے کاپیوں میں گانے لکھنے کے دعویٰ ایک اور دعویٰ کردیا، جس میں ان کا کہنا ہے کہ بعض بچے ایسے بھی ہیں جنہوں نےکاپی میں ہزار روپے کا نوٹ رکھا اورلکھا میری گنجائش اتنی ہی ہے پلیز مجھے پاس کردیں۔
یاد رہے چیئرمین انٹرمیڈیٹ بورڈ شرف علی شاہ نے باخبرسویرا میں گفتگو کرتے ہوئے کہا تھا کہ انٹر بورڈ امتحانات میں کئی طالب علم ایسے بھی تھے جنہوں نے اپنی کاپیوں میں گانے لکھے تھے۔
قائم مقام چیئرمین انٹر بورڈ کراچی نے انٹر میڈیٹ نتائج میں کم نمبر کا ذمہ دار طلبا کو ٹھہراتے ہوئے کہا تھا کہ 2 سال میں نصاب تبدیل ہوا ہے،بچے کالجز میں کلاسز لینے ہی نہیں آتے۔
مزید پڑھیں : کراچی میں انٹرمیڈیٹ فرسٹ ایئر کے طلبا کے نمبر کیوں کم آئے؟ قائم مقام چیئرمین انٹربورڈ کے اہم انکشافات
انھوں نے کہا تھا کہ طلبا کو سوالوں کے جواب معلوم نہیں ہوتے، طلبہ سمجھتے ہیں پرچہ بھردیں توٹیچرصرف نظر مار کر مارکس دیدے گا۔
