اسلام آباد : قومی احتساب بیورو کے سربراہ جسٹس (ر) جاوید اقبال نے کہا ہے کہ بد عنوان عناصر کے خلاف کی جانے والی کارروائیوں میں نمایاں اضافہ ہوا ہے۔ بدعنوانی کی شرح کے انڈیکس میں بھی کمی آئی ہے۔
نیب کی جانب سے جارہ کردہ پریس ریلیز کے مطابق چیئرمین نیب کا کہنا ہے کہ بدعنوانی کیخلاف قانون کے تحت اقدامات کئے جارہے ہیں، بلا تفریق بدعنوانی کے خاتمہ کے لیے پرعزم ہیں۔
اکتوبر2017سے اب تک بدعنوان عناصر کیخلاف ایکشن تیز ہوا۔دو ہزار اٹھارہ میں نیب کو44ہزار315شکایات موصول ہوئیں جس میں1713شکایات کی تصدیق،877انکوائریاں اور227پر تفتیش ہوئیں۔
چیئرمین نیب کا مزید کہنا ہے کہ احتساب عدالتوں میں بدعنوانی کے 440ریفرنسز دائر کئے گئے، اس وقت احتساب عدالتوں میں قانون کے تحت1210ریفرنسز زیرسماعت ہیں، انہوں نے کہا کہ نیب نے احتساب سب کے لیے کی پالیسی کے تحت 503 بدعنوان عناصر سے لوٹی گئی قومی دولت کی واپسی کے لیے کارروائی کی ہے۔
ان کارروائیوں کے نتیجہ میں نیب نے قومی دولت لوٹنے والے بدعنوان عناصر سے 2580 ملین روپے کی وصولی کی۔ جسٹس (ر) جاوید اقبال نے کہا کہ بدعنوانی کی شرح کے انڈیکس کے مطابق پاکستان کی پوزیشن کافی مستحکم ہوئی ہے، بدعنوانی کی شرح کے انڈیکس میں پاکستان175سے116ویں نمبر پر آگیا۔
