چیئرمین پاکستان کرکٹ بورڈ محسن نقوی نے کپتان محمد رضوان اور سلمان علی آغا کو شاندار بیٹنگ پر شاباش اور مبارکباد دی ہے۔
جنوبی افریقہ کے خلاف شاندار جیت کے بعد چیئرمین پی سی بی محسن نقوی نے گرین شرٹس کو شاباش دی ہے، چیئرمین پی سی بی نے جنوبی افریقہ کیخلاف ون ڈے جیتنے پر پاکستانی ٹیم کو مبارکباد دی اور کہا کہ پاکستانی کھلاڑیوں نے زبردست کھیل پیش کرکے مشکل ٹارگٹ حاصل کیا۔
محسن نقوی نے کہا کہ پاکستانی ٹیم نے میچ جیت کر فائنل کیلئے کوالیفائی کرکے قوم کو خوشیاں دیں، کپتان محمد رضوان نے صحیح معنوں میں کیپٹنز اننگز کھیلی۔
چیئرمین پی سی بی محسن نقوی نے نائب کپتان سلمان آغا کی تعریف کرتے ہوئے کہا کہ انھوں نے بھی شاندار بلے بازی کی۔
انھوں نے کہا کہ پاکستانی کھلاڑیوں نے ٹیم ورک کا مظاہرہ کرکے جیت اپنے نام کی، امید ہے کہ پاکستانی ٹیم سہ ملکی سیریز کا فائنل بھی جیتے گی۔
