پاکستان کرکٹ ٹیم کے نیویارک کے ہوٹل میں قیام کا پاکستان کرکٹ بورڈ کے چیئرمین محسن نقوی نے سخت نوٹس لے لیا ہے۔
ذرائع کا کہنا ہے کہ چیئرمین پی سی بی محسن نقوی کی مداخلت پر نیویارک میں پاکستان کرکٹ ٹیم کے ہوٹل کی تبدیلی ممکن ہوئی ہے۔
ٹیم نے پہلے جس ہوٹل میں ٹیم نے قیام کرنا تھا وہ اسٹیڈیم سے 90 منٹ کی ڈرائیو پر تھا تاہم اب جس ہوٹل میں ٹیم کو ٹھہرایا گیا ہے وہ اسٹیڈیم سے 5 منٹ کی دوری پر ہے۔
ٹیم انڈیا کو نیویارک میں گراؤنڈ سے صرف 10 منٹ کی دوری پر ٹھہرایا گیا ہے جبکہ دیگر ٹیموں کے ہوٹل ایک گھنٹے سے زیادہ کی دوری پر ہیں۔
واضح رہے کہ سری لنکا اور جنوبی افریقا کی جانب سے پہلے ہی نیویارک میں قیام کے دوران فراہم کی جانے والی سہولیات پر تحفظات کا اظہار کیا جاچکا ہے۔
محسن نقوی نے آئی سی سی سے رابطہ اور عدم اطمینان کا اظہار کیا، ایونٹ کے منتظمین کو قومی ٹیم کا ہوٹل تبدیل کرنے پر قائل کر لیا۔
ذرائع کا کہنا ہے کہ چیئرمین پی سی بی محسن نقوی نے آئی سی سی کو آگاہ کردیا ہے کہ وہ اپنی ٹیم کو ٹی ٹوئنٹی ورلڈ کپ کے کسی بھی میچ کے لیے طویل فاصلہ طے کرنے کی اجازت نہیں دے سکتے، پاکستان کے نیویارک میں 9 اور 11 جون کے میچز شیڈول ہیں۔
چیئرمین پی سی بی نے آئی سی سی پر واضح کردیا کہ اگر پاکستانی ٹیم کا ہوٹل تبدیل نہ کیا گیا تو وہ پاکستان کرکٹ بورڈ کے خرچے پر ٹیم کو بہتر اور آسان جگہ پر منتقل کر دیں گے۔
چیئرمین پی سی بی نے آئی سی سی آگاہ کردیا ہے کہ پاکستان کرکٹ ٹیم کی ذمہ داری ان کی ہے، اور وہ کھلاڑیوں کے آرام کو ہر صورت یقینی بنائیں گے۔
آسٹریلیا کا ٹی 20 ورلڈکپ میں فاتحانہ آغاز، عمان کو 39 رنز سے شکست
واضح رہے کہ قومی ٹیم آج امریکا کے خلاف میچ کے فوراً بعد نیویارک روانہ ہوجائے گی، جہاں پر قومی ٹیم 9 جون کو بھارت اور 11 جون کو کینیڈا سے مقابلہ کرے گی، جبکہ پہلے راؤنڈ کا آخری میچ 16 جون کو آئرلینڈ کے خلاف کھیلا جائے گا۔
