چیئرمین پاکستان کرکٹ بورڈ سید محسن نقوی آج علی الصباح راولپنڈی کرکٹ اسٹیڈیم پہنچ گئے اور شائقین کے لیے دستیاب سہولتوں کا جائزہ لیا۔
اے آر وائی نیوز کے مطابق پاکستان کرکٹ بورڈ کے چیئرمین سید محسن نقوی آج علی الصباح راولپنڈی کرکٹ اسٹیڈیم پہنچ گئے اور اسٹیڈیم میں شائقین کرکٹ کے لیے دستیاب سہولتوں کا جائزہ لیا۔ اس موقع پر چیف سلیکٹر وہاب ریاض بھی ان کے ہمراہ تھے۔
چیئرمین پی سی بی نے اسٹیڈیم کے مختلف حصے دیکھے۔ اس موقع پر چیف آپریٹنگ آفیسر پی سی بی سلمان نصیر نے انہیں بریفنگ دی۔
محسن نقوی نے راولپنڈی کرکٹ اسٹیڈیم کو عالمی معیار کے مطابق بنانے کی ہدایت کرتے ہوئے اسٹیڈیم کی اپ گریڈیشن کا پلان طلب کر لیا۔
چیئرمین پی سی بی نے کہا کہ پنڈی کرکٹ اسٹیڈیم کو عالمی معیار کے مطابق بنانے کے لیے انکلوژر میں سہولتوں کی فراہمی کو مزید بہتر بنانے کے ساتھ عارضی نشستوں کے بجائے مستقل نشستیں لگائی جائیں۔
