اسلام آباد: اسلام آباد کی انسدادِ دہشت گردی کی عدالت نے چیئرمین پی ٹی آئی کے قابل ضمانت وارنٹ گرفتاری جاری کردیے۔
اے آر وائی نیوز کے مطابق اسلام آباد کی انسدادِ دہشت گردی کی عدالت نے چیئرمین پی ٹی آئی اور دیگر رہنماؤں کے قابل ضمانت وارنٹ گرفتاری جاری کردیے ہیں۔
جوڈیشل کمپلیکس میں ہنگامہ آرائی سے متعلق چیئرمین پی ٹی آئی سمیت دیگر رہنماؤں کے خلاف تھانہ رمنا میں درج 2 مقدمات کی سماعت ہوئی۔
تاہم چیئرمین پی ٹی آئی آج بھی عدالت میں پیش نہیں ہوئے اور ان کے وکیل نے آج کی حاضری سے استثنیٰ کی درخواست دائر کی، کیس کی سماعت انسداد دہشتگردی عدالت کے جج ابوالحسنات ذوالقرنین نے کی۔
چیئرمین پی ٹی آئی کی جانب سے درخواست دائر کرنے والے وکیل سردار مصروف نے بتایا کہ چیئرمین پی ٹی آئی نے لاہور ہائیکورٹ میں پیش ہونا ہے، لاہور ہائیکورٹ میں پیشی کے باعث چیئرمین پی ٹی آئی اسلام آباد نہیں آسکے۔
عدالت نے جوڈیشل کمپلیکس حملہ کیس میں چیئرمین پی ٹی آئی فرخ حبیب، شبلی فراز، حسان خان نیازی کےقابل ضمانت وارنٹ گرفتاری جاری کردیئے۔
عدالت نے ریماکس دیے کہ ملزم کو عدالت پیش ہونا پڑے گا، عدالت نے چیئرمین پی ٹی آئی سمیت دیگر ملزمان کو 19 جولائی کو ذاتی حیثیت میں طلب کرتے ہوئے سماعت 19 جولائی تک ملتوی کردی۔
اس کیس میں چیئرمین پی ٹی آئی نے پہلے ہی ضمانت لے رکھی ہے لیکن آج عدالت نے انہیں پیش ہونے کا حکم دیا تھا۔
