اٹک : آئی جی جیل خانہ جات نے ڈسٹرکٹ جیل اٹک کا دورہ کیا اور چیئرمین پی ٹی آئی کو دی گئی سہولیات کا تفصیلی جائزہ لیا۔
تفصیلات کے مطابق آئی جی جیل خانہ جات پنجاب فاروق نذیر نے اٹک جیل میں سیکیورٹی، کچن، ،اسپتال، جوینائل وارڈ ، قیدی و حوالاتی بارکس کا معائنہ کیا اس کے علاوہ انہوں نے چیئرمین پی ٹی آئی کی سیکیورٹی سمیت انہیں فراہم کی گئی سہولیات کا بغور جائزہ لیا۔
اس حوالے سے آئی جی جیل خانہ جات پنجاب فاروق نذیر نے بتایا کہ چیئرمین پی ٹی آئی کو قانون کے مطابق تمام سہولیات فراہم کی گئی ہیں، ان کے کمرےمیں بیڈ، تکیہ، میٹرس اور میز ہے،
اس کے علاوہ کرسی، ایئرکولر، ایگزاسٹ فین، جائے نماز، قرآن مجید ، ایک درجن کے قریب کتابیں، اخبارات بھی ہیں، چائے تھرماس ،کھجوریں ،شہد، ٹشو پیپر، پرفیوم وغیرہ بھی شامل ہیں ، واش روم میں ویسٹرن کموڈ اور واش بیسن نصب ہے۔،
انہوں نے بتایا کہ باتھ سوپ، ائیر فریشنر، تولیہ اور ٹشو پیپر بھی موجود ہیں، چیئرمین پی ٹی آئی کی منگل کو ان کی فیملی اور جمعرات کو وکلاء سے ملاقات کرائی جاتی ہے۔
فاروق نذیر نے بتایا کہ چیئرمین پی ٹی آئی کو طبی سہولیات کی فوری فراہمی کیلئے5ڈاکٹرز تعینات ہیں، 8گھنٹے کی ڈیوٹی پر ایک ڈاکٹر ہمہ وقت موجود رہتا ہے، ڈاکٹر کی ہدایت پر چیئرمین پی ٹی آئی کو اسپیشل خوراک بھی فراہم کی جا رہی ہے، خوراک کو ڈاکٹرز کی چیکنگ کے بعد اسپیشل ٹیم کے ذریعے مہیا کیا جارہا ہے۔
آئی جی جیل نے چیئرمین پی ٹی آئی کو مہیا سہولیات پر اطمینان کا اظہار کیا، انہوں نے چیئرمین پی ٹی آئی کی بیرک میں کیمروں کی کارکردگی، لوکیشن اور پرائیویسی کو چیک کیا، آئی جی جیل خانہ جات نے نصب کیمروں کو رولز کے مطابق درست قرار دیا ہے۔
