کراچی : چیئرمین سینیٹ صادق سنجرانی کا کہنا ہے کہ میاں صاحب بزرگ ہیں کچھ بھی کہہ سکتے ہیں سیاست میں اتحاد ہوتے رہتے ہیں اس میں حیرانی کی کوئی بات نہیں،کوشش کریں گے بہترسے بہتر کام کرسکیں۔
تفصیلات کے مطابق نو منتخب چیئرمین سینیٹ صادق سنجرانی اور ڈپٹی چیئرمین سینیٹ سلیم مانڈوی والا نے مزار قائد پر حاضری دی، اس موقع پر چیئرمین سینیٹ صادق سنجرانی نے میڈیا سے گفتگو کرتے ہوئے کہا کہ سیاست میں اتحاد ہوتے رہتے ہیں اس میں حیرانی کی کوئی بات نہیں۔ آگے بھی اتحاد ہوتے رہیں گے۔
صادق سنجرانی کا کہنا تھا کہ سینیٹ میں تمام صوبوں کی برابر نمائندگی ہے، کوشش کریں گےبہترسے بہترکام کرسکیں ، کوشش کریں گے، رضاربانی نے جو معیار بنایا اسے آگے بڑھائیں، علیحدگی پسندوں کو قومی دھارے میں شامل کرنےکی کوشش کریں گے۔
چیئرمین کے انتخاب سے متعلق اعتراض پرچیئرمین سینیٹ نے کہا نوازشریف بزرگ ہیں، کچھ بھی کہہ سکتےہیں۔
بلوچستان کے حوالے سے انکا کہنا تھا کہ بلوچستان میں پہلےکی نسبت حالات بہت بہترہوئےہیں اور بلوچستان اب ترقی کی راہ پرگامزن ہے، ناراض بلوچ بھائیوں کا مسئلہ کافی مسئلہ حل ہوچکا ہے، کوشش کریں گے جو تھوڑے سے بھائی ناراض ہیں وہ مان جائیں۔
صادق سنجرانی نے اپوزیشن لیڈر سے متعلق کہا کہ سینیٹ میں اپوزیشن لیڈرکا ابھی کوئی فیصلہ نہیں ہوا جس کے نمبربہترہوں گے وہی اپوزیشن لیڈر بنے گا، گوادر سے سینیٹربھی ہمارے ساتھ ہیں۔
انکا کہنا تھا کہ آصف زرداری،بلاول بھٹو، عمران خان کاشکریہ اداکرتے ہیں، ہم تو 6ارکان کے ساتھ آئے تھے۔
چیئرمین سینیٹ نے کہا کہ حاصل بزنجوصاحب کیوں آگ بگولہ ہوگئےمعلوم نہیں، حاصل بزنجو بلوچستان سے ہیں، انہیں تو مبارکبا دینی چاہیے تھی۔
