چکوال: مدرسے کے طلبا سے اساتذہ کی مبینہ زیادتی کے واقعہ کا نگراں وزیراعلیٰ نے نوٹس لے لیا، پکڑے گئے ملزمان کا 4 روزہ ریمانڈ منظور کرلیا گیا۔
تفصیلات کے مطابق چکوال میں علاقہ مجسٹریٹ نے مدرسے کے طلبا سے زیادتی کرنے والے ملزمان کو ریمانڈ پر پولیس کے حوالے کر دیا ہے۔ 2 ملزمان کا 4 روزہ ریمانڈ منظور کیا گیا ہے۔ مدرسے کے طلبا سے اساتذہ کی مبینہ زیادتی کا نگراں وزیراعلیٰ نے نوٹس لیا ہے۔
پولیس حکام کا کہنا ہے کہ نگران وزیراعلیٰ پنجاب محسن نقوی نے اس واقعے کے حوالے سے رپورٹ طلب کرلی۔
مہتمم مدرسہ کا اپنے بیان میں کہنا تھا کہ میں بیرون ملک تھا، واقعے سے متعلق ابھی کچھ نہیں کہہ سکتا۔ جوالزامات لگائے جارہے ہیں ان میں ذرہ بھی حقیقت نہیں،
نوید حیدری مہتمم مدرسہ نے مزید کہا کہ طلبا کا تحفظ اور والدین کا اعتماد اولین ترجیح ہے۔ کلاس میں بچوں پرجسمانی تشدد کی شکایت پر والدین کو بلایا تھا،
مہتمم مدرسہ نے ملزمان کے حوالے سے کہا کہ 11 نومبر کو والدین کے سامنے دونوں اساتذہ کو اپنے ادارے سے فارغ کردیا تھا۔
واضح رہے کہ چکوال کے ایک مدرسے میں اساتذہ کی جانب سے طالبعلموں کے ساتھ مبینہ زیادتی کا افسوسناک واقعہ سامنے آیا ہے۔
ایک متاثرہ بچے کے والد کی مدعیت میں تھانہ صدر میں اساتذہ کے خلاف مقدمہ درج کروایا گیا ہے۔ مدعی نے بتایا کہ 12 سال کا بیٹا کافی دنوں سے پریشان تھا، پوچھنے پر بیٹے نے بتایا کہ استاد کی جانب سے زیادتی کا نشانہ بنایا گیا ہے۔
