پاکستان میں آئندہ سال شیڈول چیمپئنز ٹرافی 2025 کے انتظامات کا جائزہ لینے کے لیے آئی سی سی کا وفد دوسرے مرحلے میں قذافی اسٹیڈیم لاہور پہنچ گیا۔
اے آر وائی نیوز کے مطابق آئی سی سی چیمپئنز ٹرافی آئندہ سال فروری میں پاکستان کی میزبانی میں ہونی ہے جس کے انتظامات کا جائزہ لینے کے لیے آئی سی سی کا وفد گزشتہ روز پاکستان پہنچا تھا۔
آئی سی سی ایونٹ آپریشنز کی سینیئر منیجر سارہ ایڈگر اور ایونٹ منیجر عون زیدی پر مشتمل دو رکنی وفد آج دوسرے مرحلے میں لاہور کے قذافی اسٹیڈیم پہنچ گیا اور انتظامات کا جائزہ لیا۔
اس موقع پر بورڈ حکام اور قذافی اسٹیڈیم کے منتظمین نے آئی سی سی وفد کو بریفنگ دی جب کہ وفد نے اسٹیڈیم کا تفصیلی جائزہ لیتے ہوئے آمدورفت کے راستوں، سہولتوں، ڈریسنگ رومز، مختلف اسٹینڈز کا جائزہ لیا۔
وفد کے سربراہ کرس ٹیلٹلی کل اسلام آباد میں ٹیم کو جوائن کریں گے جہاں یہ سہ رکنی وفد پنڈی کرکٹ اسٹیڈیم کا دورہ کرے گا اور وہاں انتظامات کا جائزہ لے گا۔
چیمپئنز ٹرافی، آئی سی سی وفد کا نیشنل اسٹیڈیم کا دورہ
واضح رہے کہ آئی سی سی کا وفد چیمپئنز ٹرافی 2025 کے انتظامات کا جائزہ لینے کے لیے گزشتہ روز پاکستان پہنچا تھا اور پہلے روز نیشنل اسٹیڈیم کراچی، شہر میں واقع ہوٹلوں کا دورہ کیا اور سہولتوں کا جائزہ لیا تھا۔
