چیمپئنز ٹرافی کا فائنل آج بھارت اور نیوزی لینڈ کے درمیان کھیلا جا رہا ہے اور یہ روہت شرما اور ویرات کوہلی کا آخری میچ کہا جا رہا ہے۔
آئی سی سی چیمپئنز ٹرافی کا فائنل میچ آج بھارت اور نیوزی لینڈ کے درمیان کھیلا جا رہا ہے اور اس کے ساتھ ہی اس میچ کو بھارتی کپتان روہت شرما اور سینئر بیٹر ویرات کوہلی کا آخری میچ بھی کہا جا رہا ہے۔
بھارتی میڈیا کے مطابق بی سی سی آئی سلیکشن کمیٹی کے چیئرمین اجیت اگرکار چیمپئنز ٹرافی کے بعد کپتان روہت شرما کے ساتھ ان کے مستقبل سے متعلق بات چیت کرنے والے ہیں۔ تاہم ویرات کوہلی کے حوالے سے کوئی اپ ڈیٹ نہیں ہے۔
ایک اور غیر ملکی خبر رساں ادارے نے اپنی رپورٹ میں کہا ہے کہ قیاس آرائیاں جاری ہیں کہ فائنل میچ کے بعد روہت شرما اور ویرات کوہلی ریٹائرمنٹ کا اعلان کر دیں گے۔
دوسری جانب فائنل میچ سے ایک روز قبل بھارتی کرکٹ ٹیم کے نائب کپتان شبھمن گل نے پریس کانفرنس میں روہت شرما کی ریٹائرمنٹ سے متعلق کوئی حتمی جواب تو نہیں دیا تاہم ان کا کہنا تھا کہ ان کی ریٹائرمنٹ پر ڈریسنگ روم میں کوئی بات نہیں ہوئی ہے۔
واضح رہے کہ دونوں کرکٹ سپر اسٹارز کم و بیش 15 برس سے بھارتی ٹیم کا حصہ ہیں۔ وہ 2011 کا ون ڈے ورلڈ کپ، 2013 کی چیمپئنز ٹرافی اور 2024 کا ٹی 20 کپ جیتنے والی ٹیم کا حصہ رہے۔ تاہم دونوں ہی نے گزشتہ سال ٹی 20 ورلڈ کپ 2024 جیتنے کے بعد اس فارمیٹ سے ریٹائرمنٹ کا اعلان کر دیا تھا۔
37 سالہ روہت شرما کے ون ڈے کیریئر پر نظر ڈالیں تو ان کے پاس ایک روزہ کرکٹ کے کئی ریکارڈ ہیں۔ وہ ون ڈے کرکٹ میں سب سے زیادہ ڈبل سنچریاں (3)، کرکٹ ورلڈ کپ میں سب سے زیادہ سنچریاں (7) اور T20I میں مشترکہ سب سے زیادہ سنچریاں (5) کا ریکارڈ رکھتے ہیں۔
اس کے علاوہ وہ پانچ ٹی ٹوئنٹی انٹرنیشنل سنچریاں بنانے والے پہلے کھلاڑی اور 35 گیندوں میں تیز ترین T20I سنچری بنانے کا اعزاز بھی رکھتے ہیں۔ ون ڈے میچ میں سب سے زیادہ انفرادی اسکور (264) رنز کا ریکارڈ بھی انکے پاس ہے۔
روہت شرما بطور کپتان ٹی 20 میچ جیتنے والے واحد کھلاڑی اور آئی سی سی کے تمام ٹورنامنٹس کے فائنلز میں کسی بھی ٹیم کی قیادت کرنے والے پہلے کپتان ہیں۔
دوسری جانب ویرات کوہلی جو ون ڈے کرکٹ میں سب سے زیادہ سنچریاں (51) بنانے کا اعزاز رکھتے ہیں۔ ان کی آج کے میچ میں نظریں ون ڈے کرکٹ کی تاریخ کا دوسرا سب سے زیادہ رنز بنانے والے کھلاڑی بننے پر مرکوز ہوں گی، جس کے لیے انہیں صرف 55 رنز درکار ہیں۔ ٹاپ پر ٹنڈولکر نے 18 ہزار سے زائد ون ڈے رنز اسکور کر رکھے ہیں۔
ویرات کوہلی نے رواں چیمپئنز ٹرافی میں روایتی حریف بھارت کے خلاف فتح گر ناقابل شکست سنچری اسکور کی جب کہ نیوزی لینڈ کے خلاف میچ بھی 84 رنز بنا کر ٹیم کی جیت میں اہم کردار ادا کیا تھا۔
چیمپئنز ٹرافی میں بھارتی ٹرمپ کارڈ ورن چکرورتی کی ’’ناکام اداکار سے کامیاب کرکٹر‘‘ بننے کی کہانی
