آئی سی سی چیمپئنز ٹرافی 2025 کے معاملے پر ڈیڈ لاک ہے تاہم اس حوالے سے آج بڑی پیش رفت ہونے کا امکان ہے۔
اے آر وائی نیوز کو ذرائع سے ملنے والی اطلاعات کے مطابق بھارتی کرکٹ بورڈ کے سیکریٹری جے شاہ آج دبئی پہنچ رہے ہیں اور ان کی وہاں آئی سی سی آفیشلز سے ملاقات متوقع ہے۔
ذرائع نے بتایا کہ اس ملاقات میں چیمپئنز ٹرافی سے متعلق بڑی پیش رفت کا امکان ہے اور اس ملاقات کے بعد آئی سی سی چیئرمین کا پاکستان کرکٹ بورڈ کے چیئرمین محسن نقوی سے فون پر رابطہ بھی متوقع ہے۔
واضح رہے کہ آئی سی سی چیمپئنز ٹرافی 19 فروری سے 9 مارچ تک پاکستان میں شیڈول ہے اور پاکستان میگا ایونٹ کا میزبان ہونے کے ساتھ ساتھ دفاعی چیمپئن بھی ہے۔
تاہم بھارت کی جانب سے ایک بار پر رخنہ اندازی کرتے ہوئے پاکستان آنے سے انکار کر دیا گیا ہے اور ٹورنامنٹ ہائبرڈ ماڈل کے تحت کھیلنے کی خواہش ظاہر کی ہے۔
دوسری جانب پی سی بی نے آئی سی سی کو اس معاملے پر خط لکھ کر ہائبرڈ ماڈل کو یکسر مسترد کرتے ہوئے چیمپئنز ٹرافی مکمل طور پر پاکستان میں ہی کرانے کا دوٹوک اعلان کر دیا ہے۔
پی سی بی نے اپنے خط میں یہ بھی واضح کیا ہے کہ اگر بھارت چیمپئنز ٹرافی کھیلنے پاکستان نہ آیا تو آئندہ پاکستان کسی بھی فورم پر بھارت سے نہیں کھیلے گا۔
ڈیڈ لاک کے باعث چیمپئنز ٹرافی کے انعقاد میں تین ماہ سے بھی کم وقت رہ جانے کے باوجود آئی سی سی تاحال ٹورنامنٹ کے باضابطہ شیڈول کا اعلان نہیں کر سکا ہے اور اس پر جلد شیڈول اعلان کے لیے براڈ کاسٹرز کا دباؤ ہے۔
آئی سی سی جو 2027 تک کے میڈیا رائٹس فروخت کر چکا ہے اور معاہدے میں ہر ایونٹ میں ایک پاک بھارت میچ کرانا بھی شرط میں شامل ہے۔ تاہم اس ڈیڈ لاک کے باعث اگر پاک بھارت میچ متاثر ہوا تو انٹرنیشنل کرکٹ کونسل کو قانونی چارہ جوئی کا بھی سامنا کرنا پڑ سکتا ہے۔
