پاکستان کے فاسٹ بولر نسیم شاہ نے آئی سی سی چیمپئنز ٹرافی میں روایتی حریف بھارت سے مقابلے میں ٹیم کا پلان بتا دیا ہے۔
اے آر وائی نیوز کے مطابق پاکستان کرکٹ ٹیم کے فاسٹ بولر نسیم شاہ نے نیشنل اسٹیڈیم کراچی میں پریس کانفرنس کرتے ہوئے آئی سی سی چیمپئنز ٹرافی میں روایتی حریف بھارت سے 23 فروری کو ہونے والے ہائی وولٹیج میچ میں پاکستانی حکمت عملی بتا دی۔
پریس کانفرنس میں صحافی نے سوال کیا کہ بھارت چیمپئنز ٹرافی کے لیے پاکستان نہیں آ رہا۔ پاکستان نے دبئی میں اس سے مقابلے کے لیے کیا پلاننگ کی ہے۔
نسیم شاہ نے اس سوال کا جواب دیتے ہوئے کہا کہ ٹیم میں ایسی کوئی ڈسکشن نہیں ہوئی کہ انڈیا کے خلاف کیا کرنا ہے، سب کھلاڑیوں کی یہی سوچ فوکس ہے کہ ہے کہ پورے ٹورنامنٹ میں اچھی کرکٹ کھیلیں گے، کیونکہ پورے ٹورنامنٹ میں اچھا کھیلیں گے تو آگے جائیں گے۔ کس طرح فائنل اور پھر فائنل جیتیں ، ایک میچ سوچنے سے صرف دباؤ آتا ہے ٹارگیٹ حاصل نہیں ہوتا، ہم سب کا ٹارگیٹ پورا چیمپئنز ٹرافی ہے۔
یہ حقیقت ہے کہ پاکستان اور بھارت میچ پریشر والا میچ ہوتا ہے اور اس میں جو جتنا دباؤ برداشت کرتے ہوئے پرسکون ہو کر بنیادی کرکٹ کھیلے گا وہی سب سے بہترین کھیل پیش کرے گا۔
نسیم شاہ نے کہا کہ اس میچ سے قبل گراؤنڈ سے باہر بھی بڑی ہائپ ہوتی ہے، کھلاڑیوں کو میدان میں اس ہائپ کو کنٹرول کرنا ہوتا ہے لیکن ہمارا ہدف صرف بھارت کے خلاف میچ نہیں بلکہ پورا ٹورنامنٹ ہے۔
انہوں نے کہا کہ ٹیم میں اب تک کوئی ایسی بات نہیں ہوئی کہ انڈیا کے خلاف میچ میں کیا کرنا ہے۔ سب کھلاڑیوں کا فوکس اس بات پر ہے کہ پورے ٹورنامنٹ میں اچھی کرکٹ کھیلنی اور فائنل میں پہنچ کر ٹرافی جیتنی ہے۔
پاکستانی پیسر نے کہا کہ اگر صرف ایک میچ کا ہی سوچیں گے تو دباؤ آئے گا۔ ہم بھارت کے خلاف بھی کسی خاص پلاننگ کے ساتھ نہیں اتریں گے بلکہ دیگر ٹیموں کیخلاف جیسے کھیلتے ہیں، اسی سوچ کے ساتھ انڈیا کے خلاف بھی میدان میں جائیں گے۔
نسیم شاہ نے یہ بھی کہا کہ اگر گزشتہ چند سالوں میں قومی ٹیم کی کارکردگی دیکھی جائے تو 2021 میں ہم نے کافی کلوز میچز کھیلے اور بعض اوقات تو ایسا لگا کہ میچ ہمارے ہاتھ میں تھا اور غلطی سے ہاتھ سے نکل گیا۔ بطور ٹیم اور کھلاڑی سب نے ان غلطیوں کا جائزہ لے کر سدھارا ہے اور مشن یہی ہے کہ پورے ٹورنامنٹ میں بہترین کرکٹ کھیلنی ہے۔
ان پچز پر فاسٹ بولرز کے لیے کچھ نہیں، اسپنرز کا کردار اہم، نسیم شاہ
