آل راؤنڈر سلمان آغا نے نیوزی لینڈ کے خلاف کھلاڑیوں کی ناکامی کا اعتراف کرتے ہوئے مضبوط اور بہترین ٹیم بنانے کے لیے اپنے خیالات کا اظہار کیا ہے۔
میچ کے بعد پریس کانفرنس کرتے ہوئے انہوں نے کہا کہ ہمیں اپنے 30 ،40 رنز کو بڑے اسکور میں تبدیل کرنا ہو گا اگر ہمیں دنیا کی بہتر ٹیم بننا ہے تو کارکردگی میں تسلسل لانا ہو گا ہمیں اگر ٹاپ ٹیم بننا ہے تو پرفارمنس میں تسلسل لانا ہوگا۔
سلمان آغا نے کہا کہ اس وکٹ پر 300رنز کو عبور کیا جاسکتا تھا بیٹنگ میں اچھا آغاز نہ مل سکا، نہ پارٹنرشپ ملی نہ مومینٹم بن سکا، پاوور پلےمیں بھی اچھا نہ کھیل سکے۔
ان کا کہنا تھا کہ فخرزمان کے ابتدا میں نہ ہونے سے پاوور پلے میں فرق پڑا اگر فخر ہوتے تو ہمارا اسکور مختلف ہوتا، میں اپنی اننگز کو لمبا کرتا تو نتیجہ مختلف ہو سکتا تھا۔
آل راؤنڈر نے تسلیم کیا کہ دنیا کی ٹاپ ٹیموں کو ہرانے کیلئے مسلسل اچھا کھیلنا ہوگا، 320 رنز کرنا ہوتے ہیں تو پاوور پلے اچھا کرنا پڑتا ہے آج ہم نے کسی شعبے میں اچھا نہیں کیا جو ہم سے توقع تھی وہ نہ کر سکے۔
چیمپئنزٹرافی کے سب سے بڑے مقابلے سے متعلق انہوں نے کہا کہ اس میچ کو بھلا کر بھارت کیخلاف میچ کیلئے میدان میں اتریں گے۔
