پاکستان کرکٹ بورڈ کے چیئرمین محسن نقوی نے کہا ہے کہ آئی سی سی چیمپئنز ٹرافی کے لیے آج کسی بھی وقت قومی اسکواڈ کا اعلان کر دیا جائے گا۔
اے آر وائی نیوز کے مطابق چیئرمین پاکستان کرکٹ بورڈ محسن نقوی نے لاہور میں پریس کانفرنس کرتے ہوئے کہا ہے کہ آج کسی بھی آئی سی سی چیمپئنز ٹرافی کے لیے پاکستانی اسکواڈ کا اعلان کر دیا جائے گا۔ میگا ایونٹ میں آنے والی تمام ٹیموں کو خوش آمدید کہیں گے۔
چیئرمین پی سی بی نے بتایا کہ چیمپئنز ٹرافی کے لیے اسٹیڈیم کی تعمیر نو اور تزئین وآرائش کا کام تقریباً مکمل ہوچکا ہے۔ 7 فروری کو وزیراعظم شہباز شریف قذافی اسٹیڈیم لاہور اور صدر مملکت آصف علی زرداری 11 فروری کو نیشنل اسٹیڈیم کراچی کا افتتاح کریں گے۔ 16 فروری کو لاہور میں چیمپئنز ٹرافی کی افتتاحی تقریب ہوگی۔ اس تقریب میں آئی سی سی کے تمام آفیشلز کو بھی مدعو کیا ہے۔
ان کا کہنا تھا کہ چیمپئنز ٹرافی ہم سب کیلیے بہت اہم ایونٹ ہے۔ آئی سی سی جتنے ٹکٹ ملنے تھے، اس کی جگہ ہم ریونیو لیں گے۔ آئی سی سی کے تمام پاسز فروخت کر رہے ہیں تاکہ ریونیو بڑھا سکیں۔
محسن نقوی نے کہا کہ پی سی بی کی پوری ٹیم چیمپئنز ٹرافی کی بھرپور تیاریوں میں مصروف ہے۔ تاہم سرحد پار ایسے لوگ بھی ہیں جو ایک پتھر بھی لگے تو تنقید کرتے ہیں۔
انہوں نے بتایا کہ قذافی اسٹیڈیم میں عالمی معیار کی نشستیں لگائی گئی ہیں جو چین سے درآمد کی گئی ہیں جن کی 20 سال کی گارنٹی ہے۔
چیمپئنز ٹرافی کے لیے تمام تیاریاں مکمل ہیں اور میچز کیلیے بی سی سی آئی سمیت تمام کرکٹ بورڈز کو دعوت دی ہے۔ ایونٹ میں شریک ٹیموں کی آمد کا وقت مختلف ہوگا۔ چیمپئنز ٹرافی کیلیے جن لوگوں کو دعوت دی ہے ان کی فہرست شیئر کریں گے۔
