کولکتہ: آئی سی سی نے 2021 میں شیڈول چیمپئنز ٹرافی ختم کردی، چیمپئنز ٹرافی کی جگہ ورلڈ ٹی ٹوئنٹی نے لی ہے۔
تفصیلات کے مطابق انٹرنیشنل کرکٹ کونسل (آئی سی سی) کے فیوچر ٹورز پروگرام 2019 تا 2023 پر تمام رکن ممالک سے دستخط کردئیے ہیں جس کے تحت 2021 میں شیڈول چیمپئنز ٹرافی ختم کردی گئی ہے اور اس کی جگہ ورلڈ ٹی ٹوئنٹی نے لی ہے۔
آئی سی سی نے 2021 کی چیمپئنز ٹرافی ختم کرتے ہوئے اس کی جگہ 2021 میں ہونے والے ورلڈ ٹی ٹوئنٹی کی میزبانی بھارت کے سپرد کردی ہے، 2020 میں ہونے والے ورلڈ ٹی ٹوئنٹی میزبانی آسٹریلیا کرے گا۔
کولکتہ میں منعقدہ اجلاس میں آئی سی سی کے تمام 104 ایسوسی ایٹ ممالک کو ٹی ٹوئنٹی انٹرنیشنل کا درجہ دے دیا گیا ہے، جبکہ ٹیسٹ چیمپئنز شپ کی منظوری بھی دی گئی ہے جو ہر دو سال بعد کرائی جائے گی، پہلی ٹیسٹ چیمپئن شپ کا شیڈول 2019-2021 تک ہوگا، جبکہ دوسری ٹیسٹ چیمپئن شپ کا شیڈول 2021 سے 2023 پر مشتمل ہوگا۔
آئی سی سی چیف ایگزیکٹو ڈیوڈ رچرڈسن نے گفتگو کرتے ہوئے کہا کہ وہ خوش ہیں کہ فیوچرز ٹور پروگرام پر دستخط کردئیے ہیں، ٹی ٹوئنٹی کرکٹ کے ذریعے کھیل کو دیگر ممالک تک پہنچایا جائے گا اور تمام ٹی ٹوئنٹی کو بین الاقوامی کا درجہ دینا اس حوالے سے مثبت پیش رفت ہے۔
مزید پڑھیں: بھارت کو 180 رنز سے شکست، پاکستان کرکٹ کا چیمپئن بن گیا
واضح رہے کہ پاکستان نے سرفراز احمد کی قیادت میں 2017 میں آئی سی سی چیمپئنز ٹرافی کے فائنل میں بھارت کو 180 رنز کے بھاری مارجن سے شکست دے کر ٹرافی اپنے نام کی تھی۔
