چیمپئنز ٹرافی آئندہ ماہ پاکستان کی میزبان میں کھیلی جا رہی ہے پی سی بی نے اپنی سر زمین پر کھیلے جانے والے میچز کے ٹکٹ کی قیمتیں فائنل کر دی ہیں۔
آئی سی سی چیمپئنز ٹرافی آئندہ ماہ پاکستان کی میزبان میں ملک کے تین شہروں میں کھیلی جا رہی ہے تاہم بھارت ہٹ دھرمی کے باعث اپنے میچز ہائبرڈ ماڈل کے تحت دبئی میں کھیلے گا۔
پاکستانی شائقین کرکٹ طویل عرصے بعد بین الاقوامی کرکٹ ستاروں کو اپنے ملک میں ایکشن میں دیکھنے کے لیے بے تاب ہیں اور جوں جوں ایونٹ قریب آ رہا ہے وہ ٹکٹوں کی قیمت جاننے کے لیے بے چین ہیں۔
تاہم اب نئی خبر یہ ہے کہ پاکستان کرکٹ بورڈ نے آئی سی سی چیمپئنز ٹرافی کے اپنی سر زمین پر ہونے والے میچز کے ٹکٹوں کی قیمتیں فائنل کر لی ہیں۔
اس حوالے سے ذرائع نے بتایا کہ پاکستان کرکٹ بورڈ کی طے کردہ قیمتوں کی چیئرمین پی سی بی محسن نقوی نے منظوری بھی دے دی ہے۔
ذرائع کے مطابق چیمپئنز ٹرافی میں شائقین کرکٹ کے لیے کم سے کم قیمت میں ایک ہزار روپے میں ٹکٹ دستیاب ہوگا جب کہ ٹکٹ کی زیادہ سے زیادہ قیمت 25 ہزار روپے ہوگی۔
کراچی میں ٹکٹ کی کم از کم قیمت 2 ہزار روپے ہو گی۔ پاکستان اور نیوزی لینڈ کے افتتاحی میچ میں فرسٹ کلاس انکلوژر کا ٹکٹ چار ہزار اور پریمیئم کے ٹکٹ کی قیمت 7 ہزار روپے مقرر کی گئی ہے۔ وی آئی پی ٹکٹ بارہ ہزار، وی وی آئی پی 20 ہزار اور گیلری کی ٹکٹ 25 ہزار روپے میں ملے گی۔
نیشنل اسٹیڈیم میں شیڈول دیگر میچوں کے ٹکٹ 1500 روپے سے 18000 تک میں دستیاب ہوں گے۔
لاہور کے قذافی اسٹیڈیم میں آسٹریلیا اور انگلینڈ کے میچ کا ٹکٹ ایک ہزار سے 18 ہزار روپے میں مل سکے گا۔ سیمی فائنل میچ کے ٹکٹ کی کم از کم قیمت ڈھائی ہزار اور زیادہ سے زیادہ 25 ہزار ہوگی۔
