خیبرپختونخوا کے 9 اضلاع میں غیر متوقع بارشوں، گلیشیئرز پگھلنے سے سیلابی صورتحال پیدا ہونے کا امکان ہے۔
اے آر وائی نیوز کے مطابق خیبرپختونخوا میں گزشتہ ایک ہفتے سے جاری بارشوں کا سلسلہ تھم گیا لیکن محکمہ موسمیات نے آج رات سے بیشر اضلاع میں مزید بارشوں کی پیشگوئی کی ہے۔
پی ڈی ایم اے نے صوبے کے 9 اضلاع گلیشیئر پگھلنے سے سیلابی صورتحال پیدا ہونے کا الرٹ جاری کیا ہے اور انتظامیہ کو کسی بھی بڑے حادثے سے بچنے کے لیے پیشگی اقدامات اٹھانے، فیلڈ اسٹاف کو صورتحال پر نظر رکھنے کی ہدایات جاری کی گئی ہیں۔
اعلامیے کے مطابق اپر، لوئر چترال، سوات، اپر دیر، لوئر دیر، کوہستان اپر، کوہستان لوئر، مانسہرہ اور کرم میں گلیشیئر پگھلنے اور بارشوں سے سیلابی صورتحال کا سامنا ہوسکتا ہے۔
ڈائریکٹر جنرل پی ڈی ایم اے محمد قیصر خان نے بتایا کہ ہم نے ان اضلاع کے ضلعی انتظامیہ کو بروقت حفاظتی اقدامات اٹھانے کے مراسلہ جاری کیا ہے انتظامیہ کو ہدایت کردی ہے کہ فیلڈ اسٹاف کو متحرک رکھے اور سیلابی صورتحال پیدا ہونے کے خدشے کے پیش نظر مقامی آبادی کو محفوظ مقامات پر منتقل کیا جائے, اگر بروقت حفاظتی اقدامات نہ اٹھائے گئے تو مذکورہ سیلابی صورتحال سے بھاری جانی و مالی نقصانات کا خدشہ ہے۔
واضح رہے کہ محکمہ موسمیات کے مطابق ملک بھر میں 23 اپریل سے 29 اپریل تک ایک اور موسمیاتی نظام پاکستان میں داخل ہونے کا امکان ہے جس کے لیے ملک بھر میں متعلقہ اداروں کو الرٹ رہنے کی ہدایت جاری کی گئی ہے۔
