سعودی ولی عہد شہزاد محمد بن سلمان کے وژن 2030 نے مملکت کی ہئیت ہی تبدیل کر دی ہے اور سات برس میں اس میں نمایاں تبدیلیاں آئی ہیں۔
سبق نیوز کے مطابق سعودی وزیر خزانہ محمد الجدعان نے کہا ہے کہ سعودی عرب آج مختلف ملک بن چکا ہے۔ جس نے 7 برس پہلے مملکت کو دیکھا تھا، آج اسے وہ قطعی طور پر مختلف ملک دکھائی دے گا۔
رپورٹ کے مطابق سعودی وزیر نے ایک انٹرویو میں کہا کہ آج سعودی عرب میں جو تبدیلی دکھائی دے رہی ہے وہ مملکت کے وژن 2030 کی وجہ سے ہے، اسی وژن نے عوام کو ایک محور پر جمع کیا۔
انہوں نے دوران انٹرویو اس تبدیلی کا راز بھی بتایا کہا کہ سعودی عرب نے مملکت کو تبدیل کرنے کے لیے جس خفیہ نسخے کا استعمال کیا وہ نجی شعبے کو با اختیار بنانا ہے۔
وزیر خزانہ نے مزید کہا کہ پائیدار ترقی کے لیے ٹھوس اور جامع بنیادوں پر طویل المدتی منصوبہ بندی ضروری ہے، جو مستحکم اور واضح سیاسی موقف سے ہم آہنگ ہوں۔
محمد الجدعان نے اس کی وضاحت کرتے ہوئے کہا کہ نجی شعبہ درحقیقت بڑی تبدیلیوں اور سیاسی خطروں کو پسند نہیں کرتا۔ سرکاری اور نجی شعبے کے درمیان شراکت داری کے مثبت نتائج برآمد ہوتے ہیں، خاص طور پر بنیادی منصوبہ بندی کے ڈھانچوں کے حوالے سے یہ بہت ضروری ہے۔
