الیکٹرانک میڈیا ایڈیٹرز اینڈ نیوز ڈائریکٹرز ایسوسی ایشن نے پیمرا کی جانب سے ٹی وی چینلز کو جاری نوٹسز کو غیرقانونی قراردے دیا۔
تفصیلات کے مطابق ایمنڈ کا کہنا تھا کہ ٹی وی چینلز کو پیمرا کے مسلسل اعلانیہ اور غیراعلانیہ پابندیوں کے احکامات کا سامنا ہے، پیمرا نوٹسز دباؤ ڈالنے کی کوشش ہے، کراچی میں دہشتگردی کی کوریج کو بنیاد بناکر متعدد چینلز کو شوکاز نوٹسز جاری کیے گئے۔
الیکٹرانک میڈیا ایڈیٹرز اینڈ نیوز ڈائریکٹرز ایسوسی ایشن (ایمنڈ) نے کہا کہ ٹی وی چینلز کو شوکاز نوٹسز کا مقصد غیرقانونی سینسرشپ کا اطلاق ہے۔
نوٹس میں بے بنیاد الزامات کے برعکس ٹی وی چینلز نے انتہائی ذمہ دارانہ کوریج کی، ٹی وی چینلز نے کوریج میں قوانین، قومی و معاشرتی مفاد اور ضابطہ اخلاق کا خیال رکھا، ٹی وی چینلز نے حکومتی اور قانون نافذ کرنیوالے اداروں کا مؤقف عوام تک پہنچایا۔
ایمنڈ نے کہا کہ چینلز نے ٹریفک کی روانی اور بندش سے متعلق بھی ناظرین کو آگاہی دی، ٹی وی چینلز نے اپنا فرض ذمہ داری سے ادا کیا اسکےباوجودغیرقانونی نوٹسز کئےگئے۔
ایسوسی ایشن نے کہا کہ کوئی فرد یا ادارہ قانون سے بالاتر نہیں، کسی ٹی وی چینل نے ضابطہ اخلاق کی خلاف ورزی کی تو قانون کے مطابق دیکھا جاسکتاہے، کسی آڑ میں تمام چینلز کو نوٹس جاری کرنا بدنیتی کا عکاس اور ناقابل قبول ہے۔
ایمنڈ نے کہا کہ مشترکہ حکمت عملی کیلئے ایگزیکٹیو کمیٹی کا خصوصی اجلاس بلانے کا فیصلہ کیا گیا ہے، خصوصی اجلاس میں عدالتوں سے رجوع کرنے سمیت تمام آپشنز پر غور ہوگا۔
