چارسدہ: خیبر پختون خوا کے شہر چارسدہ میں اغوا کے بعد 8 سالہ بچی کا قتل کیا گیا تھا، پولیس نے قاتل کو گرفتار کر لیا۔
اے آر وائی نیوز کے مطابق 8 سال کی بچی کو اغوا کے بعد قتل کرنے میں ملوث ملزم ہجرت خان گرفتار کر لیا گیا، ڈی ایس پی چارسدہ کا کہنا ہے کہ ملزم گونگا بہرا ہے۔
پولیس حکام کے مطابق ملزم ہجرت خان نے اشاروں سے اعتراف جرم بھی کر لیا ہے۔
ڈی ایس پی تاج محمد خان کے مطابق بچی حنا کو ملزم نے 25 ستمبر کو چارسدہ کے علاقے تنگی سے اغوا کرنے کے بعد قتل کیا تھا، بچی کی لاش 26 ستمبر کو کچرے کے ڈھیر سے ملی تھی، بچی کو تشدد کے بعد گلا دبا کر قتل کیا گیا تھا۔
انھوں نے بتایا کہ ملزم ہجرت خان کی عمر 22 سال ہے اور اس کا تعلق افغانستان سے ہے۔
پولیس کا کہنا ہے کہ قاتل نے بچی پر سیمنٹ کے بلاک سے وار کیا اور پھر گلا دبا کر قتل کیا، وقوعہ کے روز 8 سالہ حنا کو ملزم افغان مہاجر نے تالیاں بجانے اور گونگے ہونے کے اشارے پر طیش میں آ کر قتل کیا تھا۔
پولیس کے مطابق ملزم کے باپ نے کہا ہے کہ ہجرت خان کو تالیاں بجانے اور گونگے ہونے کے اشارے پر سخت غصہ آتا ہے۔
