اسلام آباد: مسلم لیگ ن کے رہنما چوہدری نثار کا کہنا ہے کہ نواز شریف اور شہباز شریف کے ساتھ کام کرسکتا ہوں لیکن مریم نواز کی سربراہی میں کام نہیں کرسکتا۔
تفصیلات کے مطابق سابق وزیر داخلہ چوہدری نثار نے نیوز کانفرنس کرتے ہوئے کہا کہ جمہوریت کا ہر اول دستہ سیاسی جماعتیں ہوتی ہیں۔ کراچی آپریشن اور سیاسی معاملات سے میری وابستگی رہی ہے۔ امید کرتا ہوں ایم کیو ایم پاکستان اپنے مسائل حل کرلے گی۔
چوہدری نثار کا کہنا تھا کہ پارٹی معاملات سے دلبرداشتہ ہو کر خود کو تھوڑا سائیڈ پر کیا ہے۔ میاں نواز شریف کو جو مشورے دیے ان پرتوجہ نہیں دی گئی۔ سپریم کورٹ سے لڑائی نہیں بنتی سب کہہ رہے ہیں۔ جب ججز کی ذات پر تنقید کی جائے گی تو معاملہ گھمبیر ہوگا۔
انہوں نے کہا کہ میں نے کبھی پارٹی ڈسپلن کی خلاف ورزی نہیں کی۔ میں نے کبھی نواز شریف یا مریم نواز پر تنقید نہیں کی، ’میں بچوں کے نیچے سیاست تو نہیں کر سکتا، میری کوئی عزت بھی ہے‘۔
انہوں نے کہا کہ نواز شریف، شہباز شریف کے ساتھ کام کرنے پر اعتراض نہیں، لیکن مریم نواز کی سربراہی میں کام نہیں کر سکتا۔ ’اتناسیاسی یتیم نہیں کہ جونیئر کو سر یا میڈم کہوں‘۔
چوہدری نثار کا کہنا ہے کہ ڈان لیکس پارٹی نے وضاحت نہ کی تو میں وضاحت کا اختیار رکھتا ہوں۔ ڈان لیکس سے متعلق بہت سی غلط فہمیاں ہیں۔ راؤ تحسین اور طارق فاطمی کا رپورٹ میں ذکر نہیں تھا انہیں کس نے نکالا۔
انہوں نے کہا کہ الیکشن کے بعد مستقبل کے فیصلے کروں گا۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
