راولپنڈی: مسلم لیگ (ق) کے سربراہ چوہدری شجاعت حسین اڈیالہ جیل میں قید پی ٹی آئی رہنما پرویز الٰہی سے ملاقات کے بعد روانہ ہوگئے۔
پرویز الٰہی سے ملاقات میں چوہدری وجاہت بھی چوہدری شجاعت حسین کے ہمراہ تھے۔ علاوہ ازیں، چوہدری سالک اور چوہدری شافع بھی ملاقات کا حصہ رہے۔
ملاقات میں ملکی سیاسی مجموعی صورتحال اور خاندانی معاملات پر بات چیت ہوئی۔
(ق) لیگ کے قائدین اور پرویز الٰہی میں پونے تین گھنٹے ملاقات جاری رہی۔ ملاقات کے بعد چوہدری خاندان میڈیا سے گفتگو کیے بغیر وہاں سے روانہ ہوگیا۔
ذرائع کے مطابق پرویز الٰہی اور چوہدری شجاعت کی ملاقات جیل کے کانفرنس روم میں کروائی گئی جس میں پی ٹی آئی رہنما کی صحت اور فراہم سہولیات پر بھی بات چیت کی گئی۔
اے آر وائی نیوز سے خصوصی گفتگو کرتے ہوئے چوہدری سالک نے بتایا کہ پرویز الٰہی سے ملاقات میں کوئی سیاسی گفتگو نہیں ہوئی، وہ ہمارے بڑے ہیں اس لیے ملاقات کی۔
چوہدری سالک نے بتایا کہ شکوے شکایات تو ہماری آپس کی باتیں ہیں۔
