راولپنڈی: نانبائیوں اور انتظامیہ کے درمیان ٹھن گئی ہے، راولپنڈی میں نانبائیوں نے شٹر ڈاؤن ہڑتال کر دی ہے۔
تفصیلات کے مطابق پنجاب حکومت نے سستی روٹی کی فراہمی کو مشن بنا لیا ہے، تاہم راولپنڈی میں اس پر عمل درآمد مشکل ہو گیا ہے۔
نان بائیوں نے چھاپوں اور گرفتاریوں کے خلاف شٹر ڈاؤن ہڑتال کر دی ہے، ٹیکسلا، گجر خان، جاتلی، کلر سعیدہ اور گرد و نواح میں تندور بند کر دیے گئے ہیں جس کی وجہ سے شہریوں کو پریشانی کا سامنا ہے، اور نان پراٹھا نہ ملنے پر شہری بیکریوں کا رخ کر رہے ہیں۔
دوسری طرف ضلعی انتظامیہ ہڑتال کرنے والے نانبائیوں کے خلاف کارروائی کرنے لگی ہے، ضلعی انتظامیہ کا کہنا ہے کہ درجنوں تندور سیل کر کے سامان ضبط کر لیا گیا ہے، اور ان کے خلاف مقدمات درج کیے جا رہے ہیں۔
’’حکومت جو چاہے کر لے 16 روپے کی روٹی نہیں بیچیں گے‘‘
واضح رہے کہ نانبائی ایسوسی ایشن نے سرکاری احکامات مسترد کرتے ہوئے کہا ہے کہ پنجاب حکومت جو چاہے کر لے 16 روپے کی روٹی نہیں بیچیں گے۔ ایسوسی ایشن نے ایک اعلامیہ جاری کرتے ہوئے کہا کہ آٹے کا تھیلا 1600 روپے اور فائن میدہ 7500 روپے کرنے تک روٹی سستی نہیں کریں گے، 5 روز مزید انتظار کرنے کے بعد غیر معینہ مدت تک ہڑتال پر جائیں گے۔
