بچوں کو کئی مرتبہ خبردار اور ڈرایا جاتا ہے کہ چیونگم کو نہ نگلیں ورنہ یہ پیٹ میں جاکر چپک جائے گی ایک خیال یہ بھی ہے کہ چیونگم کئی سال تک ہضم نہیں ہوتی۔
اس بات میں کتنی سچائی ہے کہ نگلنے والی چیونگم ہمارے پیٹ میں سات سال تک چپکی رہے گی، اس حوالے سے یہاں ہم حقیقت میں یہ جاننے کی کوشش کریں گے کہ چیونگم نگلنے سےاصل میں ہوتا کیا ہے؟۔
چیونگم چبانا عام طور پر محفوظ سمجھا جاتا ہے اگرچہ اس میں موجود چینی یا چینی والے اجزاء بچوں کے لئے صحت مند نہیں ہیں لیکن چیونگم چبانے کی اجات بچوں کو اس وقت تک نہیں دینی چاہئے جب تک وہ یہ نہ سمجھ لیں کہ اسے صرف چبانا ہے نگلنا نہیں ہے۔
ماہرین صحت کے مطابق اگرچہ اسے نگلنے میں کوئی تکلیف نہیں ہوگی لیکن چھوٹے بچے بعض اوقت ایک بڑی مقدار نگل سکتے ہیں جو ان کے مسوڑھوں یا یا آنتوں میں جا کر تکلیف پیدا کرسکتی ہے۔
اصل بات یہ ہے کہ ہمارا نظام ہاضمہ اس کو ہضم نہیں کرسکتا تاہم یہ بات بھی غلط ہے کہ یہ سات سال تک پیٹ میں رہے گی لیکن کسی بھی دوسری غذاؤں کی طرح جو ہم کھاتے ہیں یہ نظام انہضام کے ذریعے حرکت کرتا ہے اور پاخانے کے ذریعے جسم سے خارج ہوتا ہے۔
امریکی ریاست فلوریڈا میں معدے کے ڈاکٹر ایری لیمیٹ کے مطابق چیونگم نِگلنا لازمی نہیں کہ صحت کے لیے نقصان دہ ہو لیکن یہ ایک اچھی عادت بھی نہیں ہے۔ ڈاکٹر ایری نے فاکس نیوز کو دیے گئے انٹرویو میں بتایا کہ اگر آپ کا ہاضمہ صحت مند ہے تو کبھی کبھار چیونگم نِگل لینا کوئی مسئلہ نہیں۔
