چھتیس گڑ: سینئر بی جے پی لیڈر شیکھر چنڈیل نے ٹرین کے آگے کود کر خود کشی کر لی۔
بھارتی میڈیا رپورٹس کے مطابق چھتیس گڑھ کے سینئر بی جے پی لیڈر اور اپوزیشن کے سابق لیڈر نارائن چنڈیل کے بھائی شیکھر چنڈیل نے نامعلوم وجوہ کی بنا پر گزشتہ رات جنجگیر ریلوے اسٹیشن کے قریب ٹرین کے سامنے آ کر اپنی زندگی کا خاتمہ کر لیا۔
پولیس کا کہنا ہے کہ خودکشی کی وجوہ معلوم نہیں ہو سکی ہیں، نہ ہی پولیس کو کوئی خود کشی نوٹ ملا، واقعے کے بعد اعلیٰ پولیس افسران موقع پر پہنچے، قریبی لوگوں کو اطلاع ملی تو وہ بھی بڑی تعداد میں موقع پر جمع گئے۔
پولیس نے لاش کو پوسٹ مارٹم کے لیے ڈسٹرکٹ اسپتال منتقل کر دیا ہے، اور وجوہ جاننے کے لیے اہل خانہ سے پوچھ گچھ شروع کر دی ہے، پولیس اس کو ہائی پروفائل کیس کے طور پر ڈیل کر رہی ہے۔
50 سالہ شیکھر چنڈیل بی جے پی کی سیاست میں سرگرمی سے حصہ لے رہے تھے، اور اسکاؤٹ گائیڈ کے ضلع کمشنر تھے۔
پولیس حکام کا کہنا ہے کہ فی الوقت یہ حتمی طور پر نہیں کہا جا سکتا ہے کہ یہ خود کشی کا کیس ہے، ان کی پراسرار موت نے پوری ریاست میں بالعموم اور سیاسی حلقوں میں بالخصوص ہلچل مچا دی ہے۔
کہا جا رہا ہے کہ شیکھر چنڈیل جمعہ کی رات ساڑھے آٹھ بجے اپنی رائس مل سے پیدل نکلے تھے۔
