ہر خاتون خانہ کی کوشش ہوتی ہے کہ وہ افطاری کے دسترخوان پر تمام گھر والوں خصوصاً روزہ داروں کی افطاری کیلئے لذیذ اور صحت بخش پکوان بنا کر رکھے۔
آج ہم نے آپ کی یہ مشکل کسی حد تک آسان کردی ہے کیونکہ آج کی افطاری کیلئے ایک بے حد ذائقے دار اور مزے دار چیز بنانے کی ترکیب آپ کیلئے پیش خدمت ہے۔
جی ہاں !! آج ہم آپ کو مزیدار ’چکن پف پیسٹری‘ بنانے کی ترکیب بتائیں گے جسے کھانے کے بعد سب انگلیاں چاٹتے ہوئے آپ کے ہنر کی تعریف کیے بغیر نہ رہ سکیں گے۔
اجزاء
اس مزیدار ’چکن پف پیسٹری‘ کی تیاری کیلئے جو اجزاء درکار ہیں اس میں ایک عدد پیاز، 5 عدد لہسن کے جوے ، آدھا کلو بون لیس چکن، ایک عدد آلو، ایک کپ مشروم، 5 عدد سرخ مرچ، 2 چمچے پیپریکا، ایک چھوٹا چمچہ سرخ مرچ پاؤڈر، ایک چمچ اوریگانو، ایک چمچ نمک، ایک چمچ کالی مرچ پاؤڈر، ایک چوتھائی کپ مکھن، 2 چمچے آٹا، 2 کپ چکن اسٹاک، 2 رول پف پیسٹری شامل ہیں۔
بنانے کا طریقہ :
ایک باؤل میں پیاز، لہسن شامل کرلیں اور انہیں سنہری ہونے تک پکائیں، پھر اس میں چکن شامل کرلیں، چکن کا رنگ سفید ہوجائے تو اس میں سرخ مرچ، کالی مرچ پاؤڈر، اوریگانو اور آلو شامل کرکے 7 سے 8 منٹ تک پکائیں۔
جب یہ اچھی طرح پک جائے تو اس میں مشروم اور حسب ضرورت سرخ مرچ شامل کریں، اس کے بعد مکھن اور آٹا شامل کرکے دوبارہ اچھی طرح مکس کریں اور 2؍ کپ چکن اسٹاک شامل کرلیں۔
تمام اجزاء کو کریمی ہونے تک اچھی طرح مکس کریں، پف پیسٹری کے رول کے اندر تیار کردہ کریمی چکن ڈالیں اور اچھی طرح چاروں طرف سے بند کرلیں۔
اب اسے 180 سینٹی گریڈ میں اَوَن میں بیکنگ کیلئے رکھ دیں، اَوَن میں رکھنے سے قبل پف پسٹری کے اوپر مایونیز لگا لیں، جس سے آپ کے پیسٹری کرنچی ہوں گے، اب گرما گرم چکن پف پیسٹری تیار ہے، آپ اسے افطاری کے دسترخوان میں پیش کریں۔
