لاہور: وزیراعلیٰ پنجاب عثمان بزدار نے کہا ہے کہ حکومت نے ذاتی مفادات کی بجائے ملکی مفادات کی سیاست کو اپنایا ہے، قانون کی بالادستی، میرٹ اور شفافیت کا فروغ ہمارا ہدف ہے۔
تفصیلات کے مطابق وزیراعلیٰ پنجاب عثمان بزدار نے کہا ہے کہ اصلاحاتی ایجنڈے پر تیزی سے کام کیا جارہا ہے، وزیراعظم عمران خان اپنی صلاحیتوں سے عوام کو ان کی منزل تک پہنچائیں گے۔
وزیراعلیٰ پنجاب نے کہا کہ وزیراعظم عمران خان کی قیادت میں پاکستان تبدیل ہورہا ہے، ہماری نیت اور سمت درست ہے، فیصلے سب کی مشاورت سے کیے جارہے ہیں، عوام کے حالات بدلنے کے لیے دن رات محنت کررہے ہیں۔
مزید پڑھیں: عوام دوست پالیسیوں سے تحریک انصاف مقبول ترین جماعت بن گئی ہے‘ عثمان بزدار
ان کا کہنا تھا کہ تحریک انصاف کا دور پائیدار ترقی اور عوام کی حقیقی خوشحالی کا دور ہے، عوام دوست پالیسیوں سے تحریک انصاف مقبول ترین جماعت بن گئی ہے۔
عثمان بزدار کا کہنا تھا کہ وزیراعظم عمران خان نے قوم کو نئی سمت دی ہے، عام آدمی کو بنیادی ضروریات کی فراہمی اور فلاح و بہبود کے لیے ٹھوس اقدامات کیے جارہے ہیں، تعلیم، صحت، سیاحت اور دیگر شعبوں میں اصلاحات لاکر بہتری لائیں گے۔
یہ پڑھیں: تحریک انصاف کی حکومت کمزور کے ساتھ کھڑی ہے، عثمان بزدار
یاد رہے کہ گزشتہ ہفتے سردار عثمان بزدار کا کہنا تھا کہ تحریک انصاف کی حکومت کمزور کے ساتھ کھڑی ہے، 100 دن میں جتنا کام کیا گزشتہ حکومتیں کسی دورمیں نہ کرسکیں۔
وزیراعلیٰ پنجاب کا کہنا تھا کہ ہر پسماندہ تحصیل کو ترقی یافتہ علاقوں کے برابر لائیں گے، نئے پاکستان کی ترقی کے سفر میں رکاوٹ حائل نہیں ہونے دیں گے۔
