لاہور: قومی کرکٹ ٹیم کے چیف سلیکٹر انضمام الحق نے کہا ہے کہ جیتنے کےباوجود کھلاڑیوں کو خامیوں پر نظر رکھنے کی ضرورت ہے کیونکہ جیت میں بھی کئی خامیاں ہوتی ہیں، اچھی بات یہ ہے کہ سیریز جیتنے کے بعد بھی کوچ ریلیکس نہیں۔
ان خیالات کا اظہار انہوں نے قذافی اسٹیڈیم میں انڈر 13 ٹورنامنٹ کے فائنل میچ کے بعد میڈیا سے گفتگو کرتے ہوئے کیا، انہوں نے کہا کہ ویسٹ انڈیز میں کبھی ٹیسٹ سیریز نہیں جیتے اور جیتنے کے بعد بھی کارکردگی بہتر رکھنا کھلاڑی کا کام ہے۔
ایک سوال کے جواب میں چیف سلیکٹرکا کہنا تھا کہ مکی آرتھر بات کرتے ہوئے گھبراتے نہیں ہیں لیکن جو ہم دیکھ رہے ہیں وہ چیز وہ نہیں دیکھ پا رہے۔
انضمام الحق نے کہا کہ ٹیم انتظامیہ نے سیریز کیلئے راحت علی کو مانگا لیکن اس کی کارکردگی ٹھیک نہیں ہے جو کھلاڑی کارکردگی دکھائے گا وہی ٹیم میں آئے گا اور جو کار کردگی نہیں دکھائے گا اس کی جگہ متبال کھلاڑیوں کو لایا جائے گا۔
احمد شہزاد اور کامران اکمل ٹیم کا حصہ بنے اور ان کی کارکردگی کو دیکھتے ہوئے ان پر مزید بھروسہ کیا جاسکتا ہے، انہوں نے ویسٹ انڈیزمیں کھلاڑیوں کی اچھی پرفارمنس پراظہار اطمینان کرتے ہوئے کہا کہ ٹیم کے پاس ٹیسٹ سیریز جیتنے کا اچھا موقع ہے۔
