کراچی کے علاقے بفر زون میں افسوسنک واقعہ پیش آیا جہاں واٹر ٹینکر کے نیچے آکر بچہ جاں بحق ہوگیا۔
واقعہ کے بی آر سوسائٹی میں آیا جس کے بعد علاقہ مکینوں نے واٹر ٹینکر اور ڈرائیور کو گھیر لیا جبکہ پولیس اطلاع ملنے پر پہنچ گئی۔
پولیس حکام نے بتایا کہ واٹر ٹینکر گھر میں پانی ڈالنے کے بعد واپس جا رہا تھا کہ اس دوران علاقے کا رہائشی بچہ اس کے نوزل سے پانی بھر رہا تھا۔
انہوں نے بتایا کہ ٹینکر ریورس ہوا تو بچہ اس کی زد میں آگیا، ڈرائیور کو حراست میں لے لیا گیا ہے۔
آج بلدیہ مواچھ گوٹھ پل کے قریب بس اور ڈمپر میں تصادم سے 9 افراد زخمی ہوئے، حادثے کے بعد ڈرائیور بس چھوڑ کرفرار ہوگیا۔
ٹریفک پولیس حکام نے بتایا کہ حادثہ بس ڈرائیور کی غلط سمت سے آنے پر پیش آیا، زخمی افراد کو اسپتال منتقل کر دیا گیا۔
ٹریفک رولز کی خلاف ورزی اور ڈرائیوروں کی غفلت کی وجہ سے کراچی میں ہلاکتوں کا سلسلہ نہ تھم سکا۔
ملیر مرغی خانہ پل کے قریب ٹریلر نے موٹر سائیکل سواروں کو کچل دیا، حادثے میں عامر جان بحق اور ساجد زخمی ہوا۔
لواحقین کا کہنا تھا کہ 29 سالہ عامر اسپیشل ایجوکیشن ڈپارٹمنٹ میں ملازمت کرتا تھا اور اس کی چند ماہ قبل شادی ہوئی تھی۔
