کاغان : کاغان حادثے میں کار 300 فٹ گہری کھائی میں گرنے کے باوجود بچہ معجزانہ طور پر کیسے بچ گیا،ریسکیو حکام بھی حیران رہ گئے۔
تفصیلات کے مطابق وادی کاغان میں افسوسناک حادثے میں تقریبا آدھی رات کو ایک کار تقریبا 300 فٹ گہرائی کی کھائی میں جاگری۔
حادثے مین گاڑی میں موجود میاں بیوی جاں بحق ہوگئے لیکن اس میں موجود چھوٹا بچہ معجزاتی طورپربچ گیا۔
کئی گھنٹے بعد جب ریسکیو حکام دریائے کنہار کے کنارے جائے حادثہ پر پہنچے تو انہوں نے دیکھا کہ تباہ حال گاڑی سے چند فٹ کی دوری پر ایک جوڑے کی لاشیں پڑی تھی مگر انہیں یہ دیکھ کر تعجب ہوا کہ قریب تین سال کا بچہ وہاں پتھر سے ٹیک لگائے خاموش بیٹھا تھا۔
بچے کو صرف چند معمولی خراشیں آئیں تھیں، دریائے کنہار میں اس وقت پانی کی سطح کم ہے لہذا بچہ محفوظ رہا۔
مقامی لوگوں کا کہنا ہے کہ رات میں یہاں جنگلی درندے بھی ہوتے ہیں لیکن بچے کی اللہ نے حفاظت کی۔
جاں بحق ہونیوالے محمد جمشید اوران کی اہلیہ کا تعلق ضلع اٹک کے علاقے حضرو سے ہے، جوہانگ کانگ سے کچھ روز قبل ہی پاکستان گھومنے آئے تھے۔
یاد رہے اس سے قبل گجرات سے آئے چار سیاح جن کی لاشیں اسکردو میں دریا کنارے سے ملیں تھیں، جنہیں ریسکیو اہلکاروں نے رسیوں کی مدد سے نکالا تھا۔
